ആശയുടെ മരണം കൊലപാതകം: ഞെട്ടലിൽ നാട്ടുകാർ

ഓയൂർ: നാട്ടുകാർക്ക് ഞെട്ടലും നൊമ്പരവുമായി ഓടനാവട്ടം വാപ്പാലപള്ളി മേലതിൽ വീട്ടൽ ആശയുടെ (29) മരണം. ഈമാസം ഒന്നിന് ഭർത്താവ് അരുണിെൻറ മർദനമേറ്റാണ് ആശക്ക് പരിക്കേറ്റത്. ജില്ല ആശുപതിയിൽ ചികിത്സയിൽ കഴിയുന്നതിനിടെ നാലിന് മരിക്ക​ുകയായിരുന്നു. മരണകാരണമായി ഭർത്താവ് പറഞ്ഞത് വീട്ടിലെ ആട് ഇടിച്ചതിനെത്തുടർന്ന് സമീപത്തെ പാറയിൽനിന്ന് വീണതാണെന്നാണ്. എന്നാൽ സമീപവാസികൾക്കും ആശയുടെ വീട്ടുകാർക്കും ഇതിൽ സംശയമുണ്ടായിരുന്നു.

പോസ്​റ്റ്മോർട്ടം റിപ്പോർട്ട് വന്നപ്പോഴാണ് ആശയുടേത് കൊലപാതകമെന്ന് തെളിഞ്ഞത്. ഭർത്താവ് ആശയെ മർദിക്കുന്നത്​ പതിവായിരുന്നു. സമീപവാസികളുമായി അധികം ബന്ധം പുലർത്താത്ത ആളാണ് പ്രതിയെന്ന് നാട്ടുകാർ പറയുന്നു.

ആസ്​ബസ്​റ്റോസ്​ പാകിയ ചെറിയ വീട്ടിൽ അരുണിെൻറ മാതാവും രണ്ട് കുട്ടികളുമാണ് താമസിച്ചിരുന്നത്. വർഷങ്ങളായി ഭർത്താവിൽനിന്ന് ആശ നേരിടുന്ന പീഡനം കാണിച്ച് പിതാവായ ജോർജ്കുട്ടി വനിത സെല്ലിന് ഉൾപ്പെടെ പരാതി നൽകിയിട്ടും നടപടി ഉണ്ടായില്ല. ആശയുടെ മരണം കൊലപാതകമാണെന്നറിഞ്ഞ ഞെട്ടലിലാണ് വാപ്പാല നിവാസികൾ.