നോക്കുകൂലി: ജലപാതനിർമാണം തടസ്സപ്പെടുത്തിയ രണ്ടുപേർ അറസ്​റ്റിൽ

ഇരവിപുരം: സംസ്ഥാന സർക്കാറിെൻറ സ്വപ്നപദ്ധതികളിലൊന്നായ സംസ്ഥാന ജലപാതയുടെ നിർമാണ പ്രവർത്തനങ്ങൾ നോക്കുകൂലി ചോദിച്ചുകൊണ്ട് തടസ്സപ്പെടുത്തിയ കേസിൽ രണ്ട് ചുമട്ടുതൊഴിലാളികളെ ഇരവിപുരം പൊലീസ് അറസ്​റ്റ് ചെയ്തു.

വാളത്തുംഗൽ ആക്കോലിൽ സൂനാമി ഫ്ലാറ്റിൽ താമസിക്കുന്ന രാജൻ (46), തെക്കേവിള മേഘാനഗർ 103 വെളിയിൽ വീട്ടിൽ ബിജിൽ (45) എന്നിവരാണ് അറസ്​റ്റിലായത്. പത്തോളം പേർ പ്രതികളായ കേസിൽ നേരത്തേ ഒരാളെ പൊലീസ് അറസ്​റ്റ് ചെയ്തിരുന്നു.

കഴിഞ്ഞ മാർച്ച് 12ന് രാവിലെ ഒമ്പതോടെ മുണ്ടയ്ക്കൽ കച്ചികടവിന് സമീപത്തായിരുന്നു സംഭവം. ഉൾനാടൻ ജലഗതാഗതവകുപ്പിെൻറ മേൽനോട്ടത്തിൽ കൊല്ലം തോട്ടിൽ ജലപാതയുടെ നിർമാണം നടക്കവെ നിർമാണപ്രവർത്തനത്തിനായി കൊണ്ടുവന്ന കോൺക്രീറ്റ് പൈലുകൾക്ക് നോക്കുകൂലി ആവശ്യപ്പെടുകയും നിർമാണ പ്രവർത്തനങ്ങൾ തടസ്സപ്പെടുത്തുകയും ചെയ്​തെന്നാണ് കേസ്.