പാലാ ബിഷപ്പ് പറഞ്ഞത് തെറ്റ്, തിരുത്തണം -കാന്തപുരം

കോഴിക്കോട്: നാർകോട്ടിക് ജിഹാദ് പരാമർശം നടത്തിയ പാലാ ബിഷപ് പറഞ്ഞത് തെറ്റാണെന്നും ആ തെറ്റ് അദ്ദേഹം തന്നെ തിരുത്തണമെന്നും കാന്തപുരം എ.പി. അബൂബക്കർ മുസ്ലിയാർ. കോഴിക്കോട്ട് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

വിഷയത്തിൽ മധ്യസ്ഥ ചർച്ചയല്ല വേണ്ടത്. തെറ്റായ വാദം മുസ്​ലിം സമുദായത്തിൻെറ പേരിൽ ഉന്നയിച്ചവർ പിൻവലിക്കണം.

ലവ് ജിഹാദ് ഇസ്​ലാം മതത്തിൽ ഇല്ല. മതത്തിൽ അങ്ങനെ ഒരു പദ്ധതിയില്ല. മുസ്​ലിം സമുദായം അതിന് വേണ്ടി ആഹ്വാനം ചെയ്തിട്ടില്ല, പറഞ്ഞിട്ടില്ല, പറയുകയും ഇല്ല. നിർബന്ധിച്ച് മത പരിവർത്തനം ചെയ്യിപ്പിക്കുന്നത് ഇസ്​ലാം അനുവദിക്കുന്നില്ല. വഞ്ചനയിലൂടെ ചെയ്യുന്നത് മത പരിവർത്തനമാകുകയില്ല. ഈ നിലക്ക് മുസ്​ലിംകളുടെ എണ്ണം വർധിപ്പിക്കണമെന്ന് ഇസ്​ലാം കൽപിച്ചിട്ടില്ല -കാന്തപുരം പറഞ്ഞു.

മന്ത്രി വി.എൻ. വാസവൻ പാലാ ബിഷപ്പിനെ പിന്തുണക്കുകയും പുകഴ്ത്തി സംസാരിക്കുകയും ചെയ്തത് മാധ്യമപ്രവർത്തകർ ചൂണ്ടിക്കാട്ടിയപ്പോൾ, അതിനെക്കുറിച്ച് ആലിചിച്ചിട്ട് പറയാം എന്നായിരുന്നു കാന്തപുരത്തിൻെറ മറുപടി. വിഷയത്തിൽ സർക്കാറിൻെറ നിലപാട് എന്താണെന്ന് മനസ്സിലായിട്ടില്ലെന്നും അദ്ദേഹം പറഞ്ഞു.