കോഴിക്കോട്: ചാനല്‍ തെരഞ്ഞെടുപ്പ് പരിപാടിക്കിടെ ഡി.വൈ.എഫ്.ഐ കേന്ദ്ര കമ്മിറ്റിഅംഗവും സി.പി.എം ജില്ലാ കമ്മിറ്റി അംഗവുമായ പി.എ. മുഹമ്മദ് റിയാസിനോട് പാകിസ്താനില്‍ പോകാനാവശ്യപ്പെട്ട സംഭവത്തില്‍ ആര്‍.എസ്.എസ് പ്രവര്‍ത്തകനെതിരെ പൊലീസ് കേസെടുത്തു.
റിയാസ് നല്‍കിയ പരാതിയുടെ അടിസ്ഥാനത്തിലാണ് കണ്ടാലറിയാവുന്ന പ്രവര്‍ത്തകനെതിരെ വെള്ളയില്‍ പൊലീസ് കേസെടുത്തത്. ഇന്ത്യന്‍ ജനപ്രാതിനിധ്യ നിയമത്തിലെ 125ാം വകുപ്പ് (മത-സാമുദായിക സ്പര്‍ധയും വര്‍ഗീയധ്രുവീകരണവും സൃഷ്ടിക്കല്‍), ശിക്ഷാനിയമം 295 എ (സമൂഹത്തില്‍ ബോധപൂര്‍വം അസ്വസ്ഥത സൃഷ്ടിക്കല്‍) എന്നീ വകുപ്പുകള്‍ പ്രകാരമാണ് കേസ്. ചാനല്‍ ദൃശ്യങ്ങള്‍ പരിശോധിച്ച് പ്രതിയെ ഉടന്‍ പിടികൂടുമെന്ന് പൊലീസ് പറഞ്ഞു.
സ്വകാര്യ ചാനല്‍ ബുധനാഴ്ച കോഴിക്കോട് ബീച്ചില്‍ നടത്തിയ പരിപാടിക്കിടെയാണ് ബി.ജെ.പി പ്രവര്‍ത്തരുടെ ആക്രോശമുണ്ടായത്. പത്തോളം വരുന്ന പ്രവര്‍ത്തകരാണ് പരിപാടി അലങ്കോലപ്പെടുത്തിയത്. കോ-ലീ-ബി സഖ്യത്തെക്കുറിച്ച് റിയാസ് പരാമര്‍ശിച്ചപ്പോഴായിരുന്നു ആക്രമണം. അവതാരകന്‍ ഇടപെട്ടതോടെ പ്രവര്‍ത്തകര്‍ റിയാസിനൊപ്പം അവതാരകനുനേരെയും തിരിയുകയായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.