ന്യൂഡൽഹി: ഉത്തരാഖണ്ഡിലെ കേദാർനാഥിൽ ഹെലികോപ്റ്റർ തകർന്ന് മരിച്ച പൈലറ്റ് അനിൽ സിങ് അവസാനമായി സംസാരിച്ചത് ഭാര്യയോട്. സുഖമില്ലാത്ത മകൾ ഫിറോസ സിങ്ങിനെ കുറിച്ചാണ് ഭാര്യ ഷൈറീൻ ആനന്ദിതയുമായി പൈലറ്റ് സംസാരിച്ചത്.
'മകൾക്ക് സുഖമില്ലെന്നും നന്നായി നോക്കണ'മെന്നുമാണ് ഷൈറീനോട് അനിൽ സിങ് അവസാനം പറഞ്ഞ വാക്കുകളെന്ന് വാർത്താ ഏജൻസി പി.ടി.ഐ റിപ്പോർട്ട് ചെയ്തു. അപകടം നടക്കുന്നതിന് തലേദിവസമാണ് ഭാര്യയുമായി ഫോണിൽ അനിൽ സംസാരിച്ചത്.
മഹാരാഷ്ട്രയിലെ അന്ധേരി സബർബിലെ ഹൗസിങ് കോളനിയിലാണ് അനിൽ സിങ്ങും കുടുംബവും താമസിക്കുന്നത്. ചലച്ചിത്ര രചയിതാവാണ് അനിലിന്‍റെ ഭാര്യ ഷൈറീൻ ആനന്ദിത.
ചൊവ്വാഴ്ചയാണ് കേദാർനാഥ് തീർഥാടകർ സഞ്ചരിച്ച ഹെലികോപ്റ്റർ തകർന്ന് 7 പേർ മരിച്ചത്. പൈലറ്റ് അനിൽ സിങ്ങും ആറ് തീർഥാടകരുമാണ് കോപ്റ്ററിൽ ഉണ്ടായിരുന്നത്. കേദാർനാഥിൽ നിന്ന് ഗുപ്തകാശിയിലേക്ക് പോവുകയായിരുന്നു സംഘം.
മോശം കാലാവസ്ഥയെ തുടർന്ന് കാഴ്ച നഷ്ടപ്പെട്ട് കോപ്റ്റർ മലമുകളിൽ തകർന്നു വീഴുകയായിരുന്നു. തീർഥാടകർ മരിച്ച സംഭവത്തിൽ മുഖ്യമന്ത്രി പുഷ്കർ സിങ് ദാമി അന്വേഷണത്തിന് ഉത്തരവിട്ടിട്ടുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.