സമൂഹ മാധ്യമങ്ങളെയും ഒ.ടി.ടി പ്ലാറ്റ്​ഫോമുകളെയും നിയന്ത്രിച്ച്​ പുതിയ മാർഗനി​ർദേശങ്ങളുമായി കേന്ദ്രം


ന്യൂഡൽഹി: സമൂഹ മാധ്യമങ്ങൾ, ഒ.ടി.ടി പ്ലാറ്റ്​ഫോമുകൾ, ഓൺലൈൻ മാധ്യമ സ്​ഥാപനങ്ങൾ എന്നിവ വഴിയുള്ള ഉള്ളടക്കങ്ങളെ നിയന്ത്രിച്ച്​ പുതിയ മാർഗ നിർദേശങ്ങൾ കേന്ദ്ര വിവര സാ​ങ്കേതിക മന്ത്രാലയം പുറപ്പെടുവിച്ചു. ഓൺലൈൻ, ഒ.ടി.ടി ഉള്ളടക്കങ്ങൾ കൃത്യമായി നിരീക്ഷിക്കുന്ന പുതിയ മാർഗ നിർദേശങ്ങൾ സമൂഹ മാധ്യമം ഉപയോഗിക്കുന്നവർക്ക്​ ശക്​തി പകരുമെന്ന്​ മാർഗ നിർദേശങ്ങൾ പ്രഖ്യാപിച്ച്​ മന്ത്രി രവി ശങ്കർ പ്രസാദ്​ പറഞ്ഞു.

''സമൂഹ മാധ്യമങ്ങൾക്ക്​ ഇന്ത്യയിൽ വ്യവസായം നടത്തുന്നത്​ സ്വാഗതാർഹമാണ്​. എന്നാൽ, സംസ്​കാര സമ്പന്നമെന്ന്​ വിളിക്കാനാവാത്ത ഉള്ളടക്കങ്ങൾ സമൂഹ മാധ്യമങ്ങളിൽ വരുന്നുണ്ട്​. ഇത്തരം പരാതികൾ ഏറെയായി എത്തുന്നു​. ഇനി മുതൽ സമൂഹ മാധ്യമം ഉപയോഗിക്കുന്നവർക്കായി പ്രത്യേക ഫോറം നിലവിൽ വരും. വെറുപ്പിന്‍റെ പ്രചാരണത്തിനായി ചിലർ സമൂഹ മാധ്യമങ്ങൾ ഉപയോഗപ്പെടുത്തുകയാണ്​. തീവ്രവാദികളും സമൂഹ മാധ്യമങ്ങൾ ഉപയോഗിക്കുന്നു. വ്യാജ വാർത്തകളുടെ ഒഴുക്കുമുണ്ട്​''- മന്ത്രി പറഞ്ഞു.

മൂന്നു മാസത്തിനകം നിർദേശങ്ങൾ നടപ്പാക്കും. ഇതുപ്രകാരം സമൂഹ മാധ്യമങ്ങളിൽ ദുരുപദിഷ്​ട സന്ദേശങ്ങൾ പ്രചരിച്ചാൽ കോടതി ഉത്തരവു വഴിയോ ബന്ധപ്പെട്ട സർക്കാർ വകുപ്പ്​ വഴിയോ ഇത്​ ആദ്യം പ്രചരിപ്പിച്ചയാളെ കണ്ടെത്തുമെന്ന്​ മന്ത്രി പറഞ്ഞു.

ഒ.ടി.ടി പ്ലാറ്റ്​ഫോം ഉള്ളടക്കങ്ങളെ യു, യു/എ 7+, യു/എ 13+, യു/എ 16+, എ എന്നിങ്ങനെ അഞ്ചു ഗണത്തിൽ പെടുത്തും. യു/എ 13+ വിഭാഗത്തിലോ അതിനും മുകളിലോ ഉള്ള ഉള്ളടക്കങ്ങൾ നൽകുന്ന ഒ.ടി.ടി പ്ലാറ്റ്​ഫോമുകൾ പാരന്‍റൽ ലോക്​ ഏർപെടുത്തണം. ഓൺലൈൻ മാധ്യമങ്ങൾ ​ദേശീയ പ്രസ്​ കൗൺസിൽ മാർഗ നിർദേശങ്ങൾ പാലിക്കണം.

പുതിയ മാർഗ നിർദേശങ്ങൾ ഓൺലൈൻ മാധ്യമ സ്​ഥാപനങ്ങളെ പരമ്പരാഗത മാധ്യമ സ്​ഥാപനങ്ങൾക്കു സമാനമായി പരിഗണിക്കാനും വ്യവസ്​ഥ ചെയ്യുന്നതായി ഹിന്ദുസ്​ഥാൻ ടൈംസ്​ റിപ്പോർട്ട്​ പറയുന്നു. വിവര,സാ​ങ്കേതിക നിയമത്തിലെ 69എ വകുപ്പിൽ പെടുത്തി നടപടികൾക്കും ഇതു സഹായകമാകും. ട്വിറ്റർ, ഫേസ്​ബുക്ക്​്​ പോലുള്ള സമൂഹ മാധ്യമങ്ങളും നിയമത്തിന്‍റെ പരിധിയിൽ വരും. 

Tags:    
News Summary - Govt unveils new guidelines to regulate content on social media, OTT platforms

വായനക്കാരുടെ അഭിപ്രായങ്ങള്‍ അവരുടേത്​ മാത്രമാണ്​, മാധ്യമത്തി​േൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്​പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്​. അത്തരം പ്രതികരണങ്ങൾ നിയമനടപടി നേരിടേണ്ടി വരും.