ശ്രീനഗർ: ജമ്മുകശ്മീരിൽ രാജ്യാന്തര അതിർത്തിയിൽ പാക് റേഞ്ചേഴ്സ് നടത്തിയ വെടിവെപ്പിൽ ബി.എസ്.എഫ് ജവാന് വീരമൃത്യു. രാമഗ്രാഹിലാണ് വെടിവെപ്പുണ്ടായത്. ബുധനാഴ്ച അർധ രാത്രിയോടെയായിരുന്നു പാകിസ്താൻ റേഞ്ചേഴ്സിന്റെ വെടിവെപ്പ്.
പ്രകോപനമില്ലാതെയാണ് പാകിസ്താൻ വെടിവെപ്പ് നടത്തിയതെന്ന് ബി.എസ്.എഫ് പുറത്തിറക്കിയ പ്രസ്താവനയിൽ പറയുന്നു. വെടിവെപ്പിൽ പരിക്കേറ്റയുടൻ ബി.എസ്.ബി ജവാനെ സമീപത്തെ ആശുപത്രിയിൽ പ്രവേശിപ്പിച്ചു. തുടർന്ന് ജമ്മുവിലെ ജി.എം.സി ആശുപത്രിയിലേക്ക് വിദഗ്ധ ചികിത്സക്കായി കൊണ്ടു പോയെങ്കിലും മരണം സംഭവിക്കുകയായിരുന്നു.
അതേസമയം, ജമ്മുകശ്മീരിലെ ഷോപിയാനിൽ സുരക്ഷാസേനയുമായുള്ള ഏറ്റുമുട്ടലിൽ ഭീകരൻ കൊല്ലപ്പെട്ടിരുന്നു. ലശ്കർ-ഇ-ത്വയിബയുമായി ബന്ധപ്പെട്ട് പ്രവർത്തിക്കുന്ന സംഘടനയായ ദ റെസിസ്റ്റൻസ് ഫ്രണ്ട് ഭീകരനാണ് ജമ്മുകശ്മീരിലെ കാതോഹാലനിൽ കൊല്ലപ്പെട്ടത്. വ്യാഴാഴ്ച പുലർച്ചെയാണ് ലോക്കൽ പൊലീസും ഇന്ത്യൻ സൈന്യവും ഭീകരർക്കായി തെരച്ചിൽ നടത്തിയത്.
ഭീകരസംഘടനയായ ടി.ആർ.എഫുമായി ബന്ധപ്പെട്ട് പ്രവർത്തിക്കുന്ന ഒരാൾ വ്യാഴാഴ്ച പുലർച്ചെ നടന്ന ഏറ്റുമുട്ടലിൽ കൊല്ലപ്പെട്ടുവെന്ന് കശ്മീർ സോൺ പൊലീസ് അറിയിച്ചു. ഇയാളിൽ നിന്ന് ആയുധങ്ങൾ പിടിച്ചെടുത്തിട്ടുണ്ടെന്നും തെരച്ചിൽ തുടരുകയാണെന്നും അദ്ദേഹം കൂട്ടിച്ചേർത്തിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.