1001 സ്ത്രീധന രഹിത വിവാഹങ്ങളൊരുക്കാൻ ആറു കോടിയുടെ പദ്ധതി

ദുബൈ: സ്​ത്രീധന വിപത്തിനെതിരായ പ്രവർത്തനങ്ങൾക്കായി രൂപവത്​കരിച്ച സ്​ത്രീധന രഹിത സമൂഹം (എസ്​.ആർ.എസ്​) സംഘടനയുടെ നേതൃത്വത്തിൽ 1001 നിർധന പെൺകുട്ടികൾക്ക്​ വിവാഹം ഒരുക്കുന്ന മംഗല്യ സാഫല്യം പദ്ധതി പ്രഖ്യാപിച്ചു. ഒാരോ പെൺകുട്ടിക്കും  വിവാഹ വസ്​ത്രവും 60000 രൂപയുടെ വിവാഹ സമ്മാനവുമാണ്​ നൽകുക. സ്​ത്രീധന രഹിത വിവാഹത്തിൽ താൽപര്യമുള്ള യുവാക്കളെ കണ്ടെത്തി വിവാഹം നടത്തിക്കൊടുക്കാനാണ്​ ലക്ഷ്യമിടുന്നതെന്ന്​ പദ്ധതി പ്രഖ്യാപന ചടങ്ങിൽ ഭാരവാഹികൾ പറഞ്ഞു. സ്​ത്രീധനപീഡന കേസുകളിൽ കൗൺസലിംഗും കാമ്പസുകളിൽ ബോധവത്​കരണവും നൽകി വരുന്നുണ്ട്​. കേരളത്തിലെ 14 ജില്ലകളിലും ജി.സി.സി രാജ്യങ്ങളിലും കമ്മിറ്റികളും രൂപവത്​കരിച്ചു. മംഗല്യ സാഫല്യം2017 ഒൗദ്യോഗിക പ്രഖ്യാപനം പി.സി. ജോർജ്​ എം.എൽ.എ നിർവഹിച്ചു. വിവാഹമൊരുക്കാനായി സംഘടന ശേഖരിച്ച 100 പേരുടെ പട്ടിക ഉപദേശക സമിതി ചെയർമാൻ തമീം അബൂബക്കർ പി.സി. ജോർജിൽ നിന്ന്​ ഏറ്റുവാങ്ങി. സ്വാർഥതയില്ലാത്ത സമൂഹം സാധ്യമാക്കാൻ ആഗ്രഹിക്കുന്ന സംഘടനകളുടെയും വ്യക്​തികളുടെയും സ്​ഥാപനങ്ങളുടെയും പിന്തുണയോടെയാണ്​  10001 വിവാഹങ്ങൾക്കാവശ്യമായ ആറു കോടി രൂപ സ്വരൂപിക്കുക. സാമ്പത്തിക സുതാര്യത ഉറപ്പാക്കുന്നതിന്​ പ്രമുഖ വ്യക്​തികൾ ഉൾക്കൊള്ളുന്ന സമിതി രൂപവത്​കരിച്ച്​ അവരുടെ മേൽനോട്ടത്തിലാണ്​ ബാങ്ക്​ അക്കൗണ്ട്​ ഇടപാടുകൾ നടത്തുകയെന്നും ഭാരവാഹികൾ പറഞ്ഞു.പദ്ധതിക്കുള്ള ആദ്യ പിന്തുണയായി 10 ​വിവാഹങ്ങൾക്കാവശ്യമായ ചെലവ്​ ഏറ്റെടുക്കുമെന്ന്​ തമീം അബൂബക്കർ അറിയിച്ചു.  
തിരക്കഥാകൃത്ത്​ ജോഷി മംഗലത്ത്​ സംസാരിച്ചു. സുധീർ അബ്​ദുൽ ഖാദർ,ഫൈസൽ ബാബു കുറ്റിപ്പുറം,അർഷാദ്​ അബ്​ദുൽ റഷീദ്​, കുഞ്ഞുമോൻ ഷാർജ,ഗഫൂർ പാലക്കാട്​,ഷാനവാസ്​ തുടങ്ങിയവർ സംബന്ധിച്ചു.