ഇത്തിഹാദ്​ റെയിൽ പാതക്ക്​ സമാരംഭം

ദുബൈ: യു.എ.ഇയുടെ സ്വപ്നപദ്ധതിയായ ഇത്തിഹാദ്​ റെയിൽപാത യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം ഉദ്​ഘാടനം ചെയ്തു. യു.എ.ഇ ഭരണാധികാരികളും മന്ത്രിമാരും ഉന്നത ഉദ്യോഗസ്ഥരും പ​ങ്കെടുത്ത ചടങ്ങിലാണ്​ പാതക്ക്​ സമാരംഭം കുറിച്ചത്​.

ചടങ്ങിന്‍റെ ചിത്രങ്ങൾ ട്വിറ്ററിൽ പങ്കുവെച്ച ശൈഖ്​ മുഹമ്മദ്, രാജ്യത്തെ 4 പ്രധാന തുറമുഖങ്ങളെയും 7 ലോജിസ്റ്റിക്കൽ മേഖലകളെയും ബന്ധിപ്പിക്കുന്ന പാത പ്രതിവർഷം 6കോടി ടൺ ചരക്ക് കൊണ്ടുപോകാൻ സഹായിക്കുമെന്ന്​ പറഞ്ഞു.

ട്രെയിൻ ശൃംഖല സമ്പദ്‌വ്യവസ്ഥയെ മെച്ചപ്പെടുത്തുമെന്നും 13.3കോടി മണിക്കൂർ ജോലിയാണിത്​ പൂർത്തിയാക്കാനെടുത്തതെന്നും വെളിപ്പെടുത്തി. ദുബൈ കിരീടാവകാശിയും എക്​സിക്യൂട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം, ഇത്തിഹാദ്​ റെയിൽ ചെയർമാൻ ശൈഖ്​ ദിയാബ്​ ബിൻ മുഹമ്മദ്​ ആൽ നഹ്​യാൻ എന്നിവരോടൊപ്പം ശൈഖ്​ മുഹമ്മദ്​ ട്രെയിനിൽ യാത്ര ചെയ്യുന്ന ചിത്രവും പുറത്തുവിട്ടിട്ടുണ്ട്​.

50 ബില്യൺ ദിർഹം ചെലവ്​ വകയിരുത്തിയ ഇത്തിഹാദ്​ പദ്ധതി പൂർത്തിയായതോടെ ദുബൈയിൽനിന്ന്​ അബൂദബിയിലേക്ക്​ 50 മിനിറ്റിലും അബൂദബിയിൽനിന്ന്​ ഫുജൈറയിലേക്ക്​ 100 മിനിറ്റിലും എത്തിച്ചേരാനാകും. 1200 കിലോമീറ്റർ നീളത്തിൽ ഏഴ്​ എമിറേറ്റുകളിലെ 11 സുപ്രധാന നഗരങ്ങളെ ബന്ധിപ്പിച്ചാണ്​ റെയിൽ പദ്ധതി കടന്നുപോകുന്നത്​.

ട്രെയിൽ കുതിച്ചോടുക മണിക്കൂറിൽ 200 കി.മീറ്റർ വേഗതയിലാണ്​. സൗദി അതിർത്തിയിലെ സില മുതൽ രാജ്യത്തിന്‍റെ കിഴക്കൻ തീരദേശമായ ഫുജൈറ വരെ നീണ്ടുനിൽക്കുന്നതാണ്​ റെയിൽ. എന്നാൽ പാസഞ്ചർ ട്രെയിനുകളും സ്ഥിരം ചരക്കുവണ്ടികളും എന്നുമുതലാണ്​ ഓടിത്തുടങ്ങുകയെന്ന്​ വ്യക്​തമല്ല.

പദ്ധതി യു.എ.ഇയുടെ സമ്പദ്‌വ്യവസ്ഥക്ക് 200 ബില്യൺ ദിർഹം സംഭാവന ചെയ്യുമെന്നാണ്​ പ്രതീക്ഷിക്കുന്നത്​. 2030ഓടെ വർഷം 3.65 കോടി യാത്രക്കാർ ഇത്തിഹാദ്​ റെയിൽ വഴി സഞ്ചരിക്കുമെന്നാണ്​ കണക്കാക്കുന്നത്​. ഇത്തിഹാദ്​ റെയിലിനെ ഒമാനിലെ സുഹാർ തുറമുഖവുമായി ബന്ധിപ്പിക്കുന്ന പാത നിർമിക്കാനുള്ള മുന്നൊരുക്കങ്ങളും നടന്നു വരികയാണ്​.