സുഹാർ: മലയാളത്തിന്റെ പ്രിയ കവി കടമ്മനിട്ട രാമകൃഷ്ണന്റെ കവിതകളെ ആധാരമാക്കി സംഘടിപ്പിക്കുന്ന ‘പടയണി രാവ്' വെള്ളിയാഴ്ച വൈകുന്നേരം ആറിന് സുഹാറിലെ ഹംമ്പാർ ഫാം ഹൗസിൽ നടക്കും. കടമ്മനിട്ടയുടെ വരികളിലെ നാട്ടുതാളവും ആവേശവും പ്രവാസലോകത്ത് പുനരാവിഷ്കരിക്കുക എന്ന ലക്ഷ്യത്തോടെ സോഹാർ ലിറ്റററി ഫോറത്തിന്റെ ആഭിമുഖ്യത്തിലാണ് ഈ സാംസ്കാരിക കൂട്ടായ്മ ഒരുങ്ങുന്നത്.
കടമ്മനിട്ടയുടെ പ്രശസ്തമായ കവിതകളുടെ ആലാപനം, കവിതകളെ കോർത്തിണക്കിക്കൊണ്ടുള്ള നാടൻ കലാരൂപങ്ങളുടെയും ദൃശ്യങ്ങളുടെയും അവതരണം, ആധുനിക മലയാള കവിതയിൽ കടമ്മനിട്ട സൃഷ്ടിച്ച മാറ്റങ്ങളെക്കുറിച്ചുള്ള ചർച്ചകൾ എന്നിവ പരിപാടിയുടെ ഭാഗമായി നടക്കും.
കടമ്മനിട്ടയുടെ കവിതകളിലെ പടയണി താളവും പ്രകൃതിബോധവും വരുംതലമുറക്ക് പരിചയപ്പെടുത്താൻ ഇത്തരം വേദികൾ സഹായിക്കുമെന്ന് സംഘാടകർ അറിയിച്ചു. സുഹാറിലെയും പരിസരപ്രദേശങ്ങളിലെയും കലാ-സാഹിത്യ പ്രേമികൾ ചടങ്ങിൽ സംബന്ധിക്കുമെന്ന് സംഘാടക സമിതിക്കുവേണ്ടി പ്രസിഡന്റ് കെ.ആർ.പി വള്ളികുന്നം അറിയിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.