മെഡ്‍ലീൻ ഗസ്സയുടെ തീരമണയുമോ?

മെഡ്‍ലീൻ ഒരു പ്രതീകമാകുന്നു

ലോകത്തിലെ ഏറ്റവും വലിയ ‘തുറന്ന ജയിലായ’ ഗസ്സയിലേക്കുള്ള സഹായ വിതരണമെല്ലാം മൂന്നു മാസത്തിലധികമായി ഇസ്രായേൽ തടഞ്ഞുവെച്ചിരിക്കുകയാണ്. അന്താരാഷ്ട്ര സമ്മർദങ്ങൾക്കിടയിലും, നാമമാത്ര ഭക്ഷണവും മരുന്നുകളും മാ​ത്രമാണ് ഇപ്പോൾ അവിടേക്ക് എത്തുന്നത്.

600 ദിവസം പിന്നിട്ട സൈനികാധിനിവേശത്തിന്റെ തുടർച്ചയിലാണിപ്പോൾ പട്ടിണിയും ഒരു യുദ്ധമുറയായി ഇസ്രായേൽ സ്വീകരിച്ചിരിക്കുന്നത്. ഗസ്സയിൽ പട്ടിണിയും ആരോഗ്യ അടിയന്തരാവസ്ഥയും റിപ്പോർട്ട് ചെയ്തിട്ട് ആഴ്ചകൾ പിന്നിട്ടു. ഈ പശ്ചാത്തലത്തിലാണ് ഒരു ഡസൻ ആക്ടിവിസ്റ്റുകളുടെ നേതൃത്വത്തിൽ ‘മെഡ്‍ലീൻ’ ഗസ്സ തീരം ലക്ഷ്യമാക്കി കുതിച്ചുകൊണ്ടിരിക്കുന്നത്.

എല്ലാംകൊണ്ടും മെഡ്‍ലീൻ ഒരു പ്രതീകമാണ്. ഗസ്സയിലെ ആദ്യത്തെ വനിത മത്സ്യബന്ധന തൊഴിലാളിയുടെ ​പേരാണ് മെഡ്‍ലീൻ. 2009ൽ മെഡ്‍ലീന്റെ പിതാവിന് ഇസ്രായേൽ ആക്രണത്തിൽ പ​രിക്കേറ്റതോടെയാണ് അവർ ഈ തൊഴിൽരംഗത്തേക്ക് വന്നത്. ഒരു ചെറുകപ്പലാണ് മെഡ്‍ലീൻ. ഗസ്സയിലേക്കുള്ള സഹായ വസ്തുക്കളുമായി മെഡി​റ്ററേനിയൻ ദ്വീപിൽ ഇറ്റലിയുടെ ഭാഗമായ സിസിലിയിൽനിന്ന് ജൂൺ ഒന്നിനാണ് കപ്പൽ യാ​ത്ര തിരിച്ചത്. 1200ൽ അധികം മൈൽ താണ്ടി കപ്പൽ ജൂൺ ഏഴിന് ഗസ്സയിലെത്താം.

പക്ഷേ, ഗസ്സ തീരത്തോടടുക്കുമ്പോൾ കപ്പൽ ഇസ്രായേൽ നാവിക സേന തടയും. 2007 മുതൽ ഇതാണ് സ്ഥിതി. അതിനാൽ, ഇസ്രായേലി​ന്റെ കടൽ ഉപരോധത്തെ ഭേദിക്കുക എന്നതുകുടി ഈ യാത്രയുടെ ലക്ഷ്യമാണ്. ഇപ്പോൾതന്നെ, ഇസ്രായേൽ ഡ്രോണുകൾ കപ്പലിനെ പിന്തുടർന്ന് നിരീക്ഷിക്കുന്നതായി വാർത്തയുണ്ട്. കപ്പൽ വഴിയിൽ തടയുമെന്ന് ഇതിനകം ഇസ്രായേൽ വ്യക്തമാക്കുകയും ചെയ്തിട്ടുണ്ട്.

ഇതൊരു ഐക്യദാർഢ്യ യാത്രകൂടിയാണ്. ഇ​സ്രായേലിന്റെ മനുഷ്യത്വവിരുദ്ധമായ നടപടികൾ ലോകത്തിന് മുന്നിൽ തുറന്നുകാണിക്കുക എന്നതും യാ​​ത്രയുടെ ലക്ഷ്യമാണ്. ഫ്രീ ഗസ്സ മൂവ്മെന്റിന്റെ ഗസ്സ ഫ്രീഡം ​ഫ്ലോട്ടിലയാണ് ഈ യാത്ര സംഘടിപ്പിക്കുന്നത്.

ഗ്രേറ്റ തുംബർഗും റിമ ഹസനും

മെഡ്‍ലീൻ കപ്പലിൽ 12 ആക്ടിവിസ്റ്റുകളാണുള്ളത്. പ്രമുഖ പരിസ്ഥിതി പ്രവർത്തക ഗ്രേറ്റ തുംബർഗ്, ഫ്രാൻസിൽനിന്നുള്ള യൂറോപ്യൻ യുനിയൻ പാർലമെന്റംഗം റിമ ഹസൻ എന്നീ വനിതകളാണ് യാ​ത്ര സംഘത്തെ നയിക്കുന്നത്. ലിയൻ കണ്ണിങ്ഹാം എന്ന ചലച്ചിത്ര നടനും യാത്രയുടെ ഭാഗമാണ്.