ചേര്ത്തല: എസ്.എന്.ഡി.പി യോഗം രാഷ്ട്രീയപാര്ട്ടി രൂപവത്കരിക്കണമെന്ന് ഞായറാഴ്ച ചേര്ത്തലയില് ചേര്ന്ന നേതൃസംഗമം. സമാന ചിന്താഗതിക്കാരുമായി ചേര്ന്ന് ഇക്കാര്യത്തില് തീരുമാനം കൈക്കൊള്ളാന് യോഗം കൗണ്സിലിനെ ചുമതലപ്പെടുത്തിയതായി ജനറല് സെക്രട്ടറി വെള്ളാപ്പള്ളി നടേശന് പറഞ്ഞു.
ഭൂരിപക്ഷസമുദായ സംഘടനകളുമായി യോജിച്ച് കാസര്കോട് മുതല് പാറശാല വരെ ആശയപ്രചാരണ ജാഥ നടത്താന് തീരുമാനിച്ചതായും വെള്ളാപ്പള്ളി പറഞ്ഞു. ചേര്ത്തലയില് നടന്ന നേതൃസംഗമം കൈക്കൊണ്ട തീരുമാനങ്ങള് മാധ്യമങ്ങളോട് വിശദീകരിക്കുകയായിരുന്നു അദ്ദേഹം. ഇടത്-വലത് മുന്നണികള് ന്യൂനപക്ഷപ്രീണനം നടത്തുകയും ഭൂരിപക്ഷസമുദായത്തെ അവഗണിക്കുകയും ചെയ്യുന്ന സാഹചര്യത്തില് സാമൂഹികനീതി നേടിയെടുക്കാന് രാഷ്ട്രീയപാര്ട്ടി രൂപവത്കരിക്കണമെന്ന പൊതുവികാരമാണ് നേതൃയോഗത്തിലുണ്ടായതെന്ന് അദ്ദേഹം പറഞ്ഞു. യോഗത്തില് പങ്കെടുത്ത അഞ്ഞൂറോളം പേരില് നാലുപേര് മാത്രമാണ് രാഷ്ട്രീയപാര്ട്ടി രൂപവത്കരിക്കരുതെന്ന് പറഞ്ഞത്.
എന്.എസ്.എസ് ഉള്പ്പെടെ സംഘടനകളുമായും ചര്ച്ച ചെയ്യും. അടുത്ത നിയമസഭാ തെരഞ്ഞെടുപ്പിനുമുമ്പ് പാര്ട്ടി രൂപവത്കരണത്തില് തീരുമാനമെടുക്കും. എസ്.എന്.ഡി.പി യോഗത്തില് വിവിധ രാഷ്ട്രീയ പാര്ട്ടികളില് വിശ്വസിക്കുന്നവരുണ്ട്. അവര് ആ പാര്ട്ടി വിട്ടുപോകേണ്ടതില്ല. ഒരു പാര്ട്ടിയിലും പെടാത്തവര് പുതുതായി രൂപം കൊള്ളുന്ന രാഷ്ട്രീയപാര്ട്ടിയില് ചേരണമെന്നും വെള്ളാപ്പള്ളി പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.