യാചകയായെത്തി മാല പൊട്ടിച്ചു കടന്ന സ്ത്രീയെ പിടികൂടി

വേങ്ങര: യാചകയായെത്തി യുവതിയുടെ അഞ്ചുപവൻ വരുന്ന മാല പൊട്ടിച്ച സ്ത്രീയെ നാട്ടുകാർ പിടികൂടി പൊലീസിലേൽപിച്ചു. വലിയോറ പരപ്പിൽപാറ ചെള്ളി അഹമ്മദ് കുട്ടിയുടെ മകൻ റജുലി‍​െൻറ ഭാര്യയുടെ മാലയാണ് പൊട്ടിച്ചത്. ഇന്നലെ ഉച്ചക്ക് ഒരു മണിയോടെ അഹമ്മദ് കുട്ടിയുടെ വീട്ടിലെത്തിയ 60 വയസ്സ് തോന്നിക്കുന്ന സ്ത്രീയാണ് കവർച്ചശ്രമം നടത്തിയത്. യാചകവേഷത്തിലെത്തിയ സ്ത്രീക്ക് യുവതി 10 രൂപ നൽകി. തുടർന്നും പോകാതിരുന്നതിനെ തുടർന്ന് 100 രൂപ നൽകി. ഈ സമയത്ത് യുവതിയുടെ കഴുത്തിലണിഞ്ഞ മാല പൊട്ടിക്കുകയായിരുന്നു. ബഹളം വെച്ചതിനെ തുടർന്ന് ഓടിക്കൂടിയ നാട്ടുകാർ സ്ത്രീയെ പിന്തുടർന്ന് പിടികൂടി മാല കണ്ടെടുക്കുകയായിരുന്നു. സ്ത്രീയെ വേങ്ങര പൊലീസിലേൽപിക്കുകയും ചെയ്തു. ഇവർ കക്കാട് താമസമാണെന്നും ബംഗളൂരു സ്വദേശിയാണെന്നും ചോദ്യം ചെയ്യലിൽ പറഞ്ഞതായി യുവതിയുടെ ബന്ധുക്കൾ പറഞ്ഞു.