വീട് കുത്തിത്തുറന്ന് 30,000 രൂപ കവർന്നു

നേമം: അടച്ചിട്ടിരുന്ന വീട് കുത്തിത്തുറന്ന് അലമാരയിൽ സൂക്ഷിച്ചിരുന്ന 30,000 രൂപ കവർന്നു. അരിക്കടമുക്ക് വെള്ളംകെട്ടുവിളയിൽ റിട്ട. സെക്രട്ടേറിയറ്റ് ജീവനക്കാരൻ ജയരാജന്‍റെ ശ്രേയ ഹൗസ് കുത്തിത്തുറന്നാണ് മോഷണം നടത്തിയത്.

ഞായറാഴ്ച രാത്രി 7 മണിയോടെ മലയത്തുള്ള ബന്ധുവീട്ടിൽപോയ വീട്ടുകാർ പുലർച്ചെ 1.30-ന് തിരികെ എത്തുമ്പോഴാണ് മോഷണവിവരം ശ്രദ്ധയിൽപ്പെടുന്നത്. ഗേറ്റ് തുറന്ന് ഉള്ളിലേക്ക് കയറുമ്പോൾ രണ്ടുപേർ ഓടി രക്ഷപ്പെടുന്നത് കണ്ടതായി വീട്ടുകാർ പൊലീസിൽ മൊഴി നൽകി.

വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി. നരുവാമൂട് പൊലീസ് കേസെടുത്ത് അന്വേഷണം ആരംഭിച്ചു.