സുരക്ഷ വീഴ്ച: മൂന്ന് സൈനികരെ പിരിച്ചുവിട്ടു

ന്യൂഡൽഹി: ദേശീയ സുരക്ഷ ഉപദേശകൻ അജിത് ഡോവലിന്റെ വീട്ടിലുണ്ടായ സുരക്ഷ വീഴ്ചയുമായി ബന്ധപ്പെട്ട് മൂന്ന് സി.ഐ.എസ്.എഫ് കമാൻഡോകളെ ജോലിയിൽനിന്ന് പിരിച്ചുവിട്ടു. രണ്ട് മുതിർന്ന ഉദ്യോഗസ്ഥരെ ജോലിയിൽനിന്ന് മാറ്റിനിർത്തുകയും ചെയ്തു. 2022 ഫെബ്രുവരി 16ന് നടന്ന സംഭവത്തിൽ നടത്തിയ അന്വേഷണത്തിൽ കുറ്റക്കാരാണെന്ന് കണ്ടെത്തിയതിനെ തുടർന്നാണ് നടപടി. രാവിലെ 7.30ന് ബംഗളൂരു സ്വദേശി ഡോ​വലിന്റെ ​വീട്ടിലേക്ക് എസ്.യു.വി കാറിൽ അതിക്രമിച്ചു കയറുകയായിരുന്നു. കസ്റ്റഡിയിലെടുത്ത് ഡൽഹി പൊലീസിന് കൈമാറിയ ഇയാൾക്ക് മാനസികാസ്വാസ്ഥ്യമുണ്ടെന്ന് പൊലീസ് പറഞ്ഞിരുന്നു.