കൊച്ചിയിൽ വീണ്ടും വൻ കവർച്ച; ആലുവയിൽ 100 പവനും ലക്ഷം രൂപയും കവർന്നു

ആലുവ: ആളില്ലാത്ത വീട് കുത്തിത്തുറന്ന് 100 പവനും ലക്ഷം രൂപയും കവർന്നു. മഹിളാലയം കവലയിൽ പടിഞ്ഞാറേ പറമ്പിൽ അബ്​ദുല്ലയുടെ വീട്ടിലായിരുന്നു കവർച്ച. ഞായറാഴ്ച രാവിലെ 7.30ഓടെ കുടുംബം മമ്പുറത്ത് സന്ദർശനത്തിന് പോയിരുന്നു. രാത്രി വീട്ടിൽ തിരിച്ചെത്തിയപ്പോഴാണ് മോഷണ വിവരമറിഞ്ഞത്. 

വീടിന് പിന്നിലെ കതകി​െൻറ താഴ് തകർത്താണ് മോഷ്​ടാവ് അകത്ത് കടന്നത്. വാക്കത്തിയും പിക്കാസും വീടിനകത്ത് കണ്ടെത്തി. വീട് മുഴുവൻ വലിച്ചുവാരി പരിശോധിച്ച നിലയിലാണ്. എസ്.പി എ.വി. ജോർജ് ഉൾപ്പെടെ ഉന്നത പൊലീസ് ഉദ്യോഗസ്ഥർ വീട്ടിലെത്തി പരിശോധന നടത്തി. വിവാഹാവശ്യത്തിന് ലോക്കറിൽനിന്ന്​ എടുത്തതായിരുന്നു സ്വർണം.