കുറയുന്നത് പോലെ കൂടാനും പാടില്ല! വൈറ്റമിൻ ഡി കൂടിയാലുള്ള പ്രശ്നങ്ങൾ..

ശരീരത്തിന് ആവശ്യമുള്ള പ്രധാനപ്പെട്ട പോഷണങ്ങളിൽ ഒന്നാണ് വൈറ്റമിൻ ഡി. എല്ലുകളെ കരുത്തുറ്റതാക്കാനും, പ്രതിരോധശേഷി വർധിപ്പിക്കാനും മാനസികാരോഗ്യം മെച്ചപ്പെടുത്താനുമൊക്കെ ഈ പോഷണം സഹായിക്കും.

എന്നുകരുതി ആവശ്യമില്ലാതെ വൈറ്റമിൻ ഡി സപ്ലിമെന്‍റുകൾ വാരി കഴിക്കുന്നത് എട്ടിന്‍റെ പണി തരുമെന്ന് ആരോഗ്യ വിദഗ്ധർ പറയുന്നു.

അടുത്തിടെ യുകെയില്‍ സംഭവിച്ച ഒരു മരണവും വൈറ്റമിന്‍ ഡിയുടെ അമിത ഉപയോഗത്തെ പറ്റി മുന്നറിയിപ്പ് നല്‍കുന്നുണ്ട്.

മരണത്തിന് ഒൻപത് മാസങ്ങൾക്ക് മുൻപാണ് ഈ രോഗി സ്‌ഥിരമായി വൈറ്റമിൻ ഡി സപ്ലിമെന്റുകൾ എടുക്കാൻ തുടങ്ങിയത്.

ഡോക്ട‌റുടെ നിർദ്ദേശപ്രകാരമല്ലാതെയുള്ള സപ്ലിമെന്റുകളുടെ ഉപയോഗം, ഫോർട്ടിഫൈഡ് ഭക്ഷണങ്ങളുടെയും കോഡ് ലിവർ ഓയിലിന്റെയും അമിത ഉപയോഗം, വൈറ്റമിൻ ഡിയുടെ ചയാപചയത്തെ ബാധിക്കുന്ന ചിലതരം രോഗങ്ങൾ എന്നിവയും വൈറ്റമിൻഡിയുടെ തോത് ക്രമാതീതമായി ഉയരുന്ന ഹൈപ്പർ വൈറ്റമിനോസിസിലേക്ക് നയിക്കാം.

ഓക്കാനം, ഛർദ്ദി, വിശപ്പില്ലായ്‌മ, മലബന്ധം, ക്ഷീണം, ഭാരനഷ്ടം എന്നിവയെല്ലാം ഹൈപ്പർ വൈറ്റമിനോസിസിന്റെ ലക്ഷണങ്ങളാണ്. കാൽസ്യത്തിന്റെറെ തോത് ശരീരത്തിൽ ഉയരുന്നത് ആശയക്കുഴപ്പം, ശ്രദ്ധക്കുറവ്, അമിത ദാഹം, അമിതമായ തോതിൽ മൂത്രമൊഴിക്കാൻ തോന്നൽ, വൃക്ക നാശം എന്നീ പ്രശ്‌നങ്ങളിലേക്കും നയിക്കാം.