അനധികൃത മദ്യവില്‍പന: ബാര്‍മാന്‍ അറസ്റ്റില്‍

കൊച്ചി: അനധികൃതമായി മദ്യവില്‍പന നടത്തിയ ബാര്‍ ജീവനക്കാരനെ എക്സൈസ് അറസ്റ്റ് ചെയ്തു. ബാറുടമക്കെതിരെ കേസെടുത്തു. കതൃക്കടവ് -തമ്മനം റോഡിലെ ഇടശ്ശേരി മാന്‍ഷനില്‍ ബാര്‍മാനായ കട്ടപ്പന സ്വദേശി രാജേഷാണ് പിടിയിലായത്. ലൈസന്‍സി അങ്കമാലി സ്വദേശിനി സി.പി. മാഗിയെ രണ്ടാം പ്രതിയാക്കി കേസെടുത്തു. ബാറില്‍നിന്ന് മദ്യം പുറത്തേക്ക് വില്‍പന നടത്താന്‍ പാടില്ളെന്ന അബ്കാരി ആക്ടിലെ വ്യവസ്ഥ ലംഘിച്ച് ബിയര്‍ വിറ്റതിനാണ് നടപടി. ഇവിടെനിന്ന് ഒരാള്‍ക്ക് വില്‍പന നടത്തിയ നാല് കുപ്പി ബിയര്‍ ബാറിന് പുറത്തുവെച്ച് എക്സൈസ് സംഘം പിടിച്ചെടുത്തു. ലൈസന്‍സ് വ്യവസ്ഥ ലംഘിച്ചതിനാണ് സെക്ഷന്‍ 56 ബി പ്രകാരം ബാര്‍മാനും ഉടമക്കുമെതിരെ കേസെടുത്തത്. ബാര്‍മാനെ പിന്നീട് ജാമ്യത്തില്‍ വിട്ടു.