നേരം പുലരും മുമ്പ് മരുന്നുമായി ഫയര്‍ഫോഴ്‌സ്

തിരുവനന്തപുരം: കോവിഡ് കാലത്ത് സംസ്ഥാനത്തിൻെറ ഏത് ഭാഗത്തും അർബുദ ചികിത്സക്കുള്ള മരുന്നെത്തിച്ച് മാതൃക സൃഷ്ടിക്കുകയാണ് ഫയര്‍ഫോഴ്‌സ്. സംസ്ഥാന ആരോഗ്യവകുപ്പിൻെറയും ആര്‍.സി.സിയുടെയും യുവജന കമീഷൻെറയും സഹകരണത്തോടെ ഫയര്‍ഫോഴ്‌സ് ഇതുവരെ 1800ഓളം രോഗികള്‍ക്ക് 16 ലക്ഷത്തോളം രൂപയുടെ മരുന്നാണെത്തിച്ചത്. കോവിഡ്-19ൻെറ പശ്ചാത്തലത്തില്‍ സംസ്ഥാനത്ത് വിവിധ ജില്ലകളിലായി ആര്‍.സി.സിയുടെ സഹകരണത്തോടെ 22ഉം തമിഴ്‌നാട്ടില്‍ കന്യാകുമാരിയിലും അർബുദ ചികിത്സാ കേന്ദ്രങ്ങള്‍ ആരംഭിച്ചിരുന്നു. ഈ അർബുദ ചികിത്സാകേന്ദ്രങ്ങളില്‍ ചികിത്സയിലുള്ള രോഗികള്‍ക്കുള്ള കീമോതെറപ്പി ഉള്‍പ്പെടെയുള്ള മരുന്നുകളാണ് ആര്‍.സി.സിയില്‍നിന്ന് അതത് കേന്ദ്രങ്ങളിലും രോഗികളുടെ അടുത്തും നേരിട്ട് എത്തിക്കുന്നത്.