പൂഴ്ത്തിവെപ്പ്​, അമിതവില: 117 കടയുടമകൾക്കെതിരെ നടപടി

തിരുവനന്തപുരം: കരിഞ്ചന്തയും പൂഴ്ത്തിവെപ്പും അമിതവിലയും തടയുന്നതിനായി വിജിലൻസ് നടത്തുന്ന പരിശോധനയുടെ ഭാഗമായി 117കടയുടമകൾക്കെതിരെ നടപടിക്ക് ശിപാര്‍ശ ചെയ്തു. 245 വ്യാപാരസ്ഥാപനങ്ങളിലാണ് വിജിലൻസ് പരിശോധന നടന്നത്. തിരുവനന്തപുരം -21, എറണാകുളം - 20, കാസര്‍കോട് -12, തൃശൂർ - 11, പാലക്കാട്‌ , മലപ്പുറം - 10 വീതം വ്യാപാരസ്ഥാപനങ്ങള്‍ക്കെതിരെയാണ് നടപടികള്‍ക്ക് ശിപാര്‍ശ ചെയ്തിട്ടുള്ളത്. ലോക്ഡൗൺ കാലത്ത് അമിത വില ഈടാക്കി ഉപഭോക്താക്കളെ കൊള്ളയടിക്കാനുള്ള മൊത്ത കച്ചവടക്കാരുടെയും ചില്ലറ വ്യാപാരികളുടെയും നടപടികൾ അവസാനിപ്പിക്കുന്നതുവരെ പരിശോധനകള്‍ തുടരുമെന്ന് വിജിലന്‍സ് ഡയറക്ടര്‍ എസ്. അനില്‍കാന്ത് അറിയിച്ചു.