അധ്യാപകരും രക്ഷിതാക്കളും കൈകോർത്തു; കുണ്ടറ ഉപജില്ലയിലെ സ്​നേഹവീടിന് ശിലപാകി

കുണ്ടറ: മന്ത്രി ജെ. മേഴ്സിക്കുട്ടിയമ്മയുടെ നേതൃത്വത്തിൽ നടപ്പാക്കുന്ന ഇടം പദ്ധതിയിൽ ഉൾപ്പെടുത്തി ഉപജില്ലയിലെ മുഴുവൻ സ്കൂളുകളിലെ അധ്യാപകരും രക്ഷിതാക്കളും ചേർന്ന് സമാഹരിച്ച തുക ഉപയോഗിച്ച് നിർമിക്കുന്ന വീടിന് മന്ത്രി ശിലപാകി. മതാവ് മരിച്ചുപോവുകയും പിതാവ് ഉപേക്ഷിക്കുകയും ചെയ്ത വിദ്യാർഥിനികളായ മൂന്ന് സഹോദരിമാർക്ക് വേണ്ടിയാണ് ഇടം വീടൊരുങ്ങുന്നത്. കൊറ്റങ്കര തെറ്റിവിളച്ചിറ വയലിൽ വീട്ടിൽ വിനോദ്-സിനിത ദമ്പതികളുടെ വീടില്ലാത്ത മക്കൾക്കാണ് വീട് നിർമിച്ചുനൽകുന്നത്. കുട്ടികൾ പഠിക്കുന്ന എം.ജി.ഡി ഹയർസെക്കൻഡറി സ്കൂൾ പി.ടി.എ ഭാരവാഹികൾക്ക് വിവിധ സ്കൂളുകളിൽനിന്ന് സമാഹരിച്ച തുക എ.ഇ.ഒ ഗോപകുമാരൻപിള്ള കൈമാറി. മുഖത്തല ബ്ലോക്ക് പഞ്ചായത്ത് പ്രസിഡൻറ് രാജീവ് അധ്യക്ഷത വഹിച്ചു. ബി.ഡി.ഒ ആർ. വിമൽചന്ദ്രൻ, എ.ഡി.സി സുദേശൻ, ബ്ലോക്ക് പഞ്ചായത്ത് അംഗം ഗിരിജകുമാരി, വാർഡ് അംഗം ഷംല, ഡി. വിമല, എച്ച്. ഹുസൈൻ, അർജുനൻപിള്ള, ശാരദ, അനിൽകുമാർ എന്നിവർ പങ്കെടുത്തു.