പഞ്ചായത്ത് ഓഫിസ് മാത്രമല്ല, പഞ്ചായത്ത് മുഴുവന്‍ ഇനി സജി ‘വൃത്തിയാക്കും’

വിഴിഞ്ഞം: പഞ്ചായത്തിലെ താല്‍ക്കാലിക ജീവനക്കാരിയില്‍ നിന്ന് പഞ്ചായത്തിന്‍െറ അമരത്തത്തെുമ്പോള്‍ റൂബി എന്ന സജിക്ക് ഇതു കോണ്‍ഗ്രസിനോടുള്ള മധുരപ്രതികാരം. പത്തുവര്‍ഷമായി കോട്ടുകാല്‍ ഗ്രാമപഞ്ചായത്തിലെ തൂപ്പുജോലി ഉള്‍പ്പടെ ചെയ്തുവരുന്ന താല്‍ക്കാലിക ജീവനക്കാരി ടി.സജിയാണ് അഞ്ചുവര്‍ഷത്തേക്ക് കോട്ടുകാല്‍ ഗ്രാമപഞ്ചായത്തിനെ നയിക്കുന്നത്. പഞ്ചായത്ത് കമ്മിറ്റി കൂടുന്ന വേളയില്‍ അംഗങ്ങള്‍ക്ക് ചായ വിതരണം ചെയ്യുന്നതിനിടയില്‍ ഒരിക്കല്‍ പോലും കമ്മിറ്റിയില്‍ അംഗമാകുമെന്നു സജി കരുതിയിട്ടില്ല. കുടുംബത്തെ മുന്നോട്ടുകൊണ്ടുപോകാന്‍ രാവിലെ അഞ്ചുമുതല്‍ ഏഴുവരെ നെല്ലിമൂട്ടിലെ പെട്രോള്‍ പമ്പില്‍ ജോലിക്കുപോയ ശേഷമാണ് സജി പഞ്ചായത്ത് ഓഫിസില്‍ എത്തുന്നത്. പഞ്ചായത്തിലെ ജോലികള്‍ക്കുശേഷം സജി വീണ്ടും രാത്രി വൈകുംവരെ പെട്രോള്‍ പമ്പില്‍ ജോലി ചെയ്യും. ബി.കോം ബിരുദ പഠനം പൂര്‍ത്തിയാക്കിയ സജി അങ്കണവാടി വര്‍ക്കറായിട്ടായിരുന്നു തുടക്കം. പിന്നീട് 2005 ലാണ് ഗ്രാമപഞ്ചായത്തിലെ താല്‍ക്കാലിക ജോലിക്കാരിയാകുന്നത്. ഗ്രാമപഞ്ചായത്ത് യോഗവും മറ്റും നടക്കുമ്പോള്‍ ചായ വിതരണമുള്‍പ്പെടെ ശിപായി ജോലിക്കിടെ ഒരിക്കല്‍ പോലും സജി വിചാരിച്ചിട്ടുണ്ടാവില്ല നാളെ താന്‍ ഇവിടുത്തെ അധ്യക്ഷ പദവിയിലത്തെുമെന്ന്. കഴിഞ്ഞ യു.ഡി.എഫ് ഭരണസമിതി പ്രസിഡന്‍റായിരുന്ന ബി.ശിവകുമാര്‍ പക്ഷേ, സജിയുടെ പാര്‍ലമെന്‍ററി രംഗത്തെ പ്രവേശവും വിജയവും പ്രവചിച്ചിരുന്നു. മണ്ണക്കല്ല് വാര്‍ഡില്‍ കോണ്‍ഗ്രസ് സ്ഥാനാര്‍ഥിയാകുമെന്ന ആദ്യ പ്രഖ്യാപനം മാറിമറിഞ്ഞു. എന്നാല്‍, മത്സരരംഗത്തിറങ്ങിയ സജി പിന്‍വാങ്ങിയില്ല. സ്വതന്ത്രയായി മത്സരിച്ച് നല്ല വിജയം നേടി. ഒടുവില്‍ പ്രസിഡന്‍റുമായി. ഭര്‍ത്താവും മൂന്നു മക്കളുമടങ്ങുന്നതാണ് സജിയുടെ കുടുംബം. ദാരിദ്ര്യവും കഷ്ടപ്പാടുകളും ഏറെയറിഞ്ഞതിനാലാവണം ഗ്രാമപഞ്ചായത്തിലെ താഴേക്കിടയിലുള്ളവരുടെ ഉന്നമനത്തിനാവും തന്‍െറ മുന്‍ഗണനയെന്ന് സജി പറയുന്നു.