ജില്ലാ പഞ്ചായത്തും എട്ട് ബ്ളോക്കും 51 പഞ്ചായത്തും ഇടതിന്

തിരുവനന്തപുരം: തദ്ദേശ സ്ഥാപനങ്ങളിലേക്കുള്ള അധ്യക്ഷ, ഉപാധ്യക്ഷന്മാരുടെ തെരഞ്ഞെടുപ്പ് പൂര്‍ത്തിയായപ്പോള്‍ ജില്ലയില്‍ ഇടതുപക്ഷത്തിന് വ്യക്തമായ മേല്‍ക്കൈ. ജില്ലാ പഞ്ചായത്തിനുപുറമെ എട്ട് ബ്ളോക് പഞ്ചായത്തും 51 ഗ്രാമപഞ്ചായത്തും എല്‍.ഡി.എഫ് ഭരിക്കും. യു.ഡി.എഫിന് രണ്ട് ബ്ളോക് പഞ്ചായത്തും 18 ഗ്രാമപഞ്ചായത്തും നേടാനായി. പോത്തന്‍കോട് ബ്ളോക് പഞ്ചായത്തില്‍ യു.ഡി.എഫിന് മേല്‍ക്കൈ ഉണ്ടെങ്കിലും അധ്യക്ഷ തെരഞ്ഞെടുപ്പ് നടന്നില്ല. ഇവിടെ യു.ഡി.എഫിന് ഏഴും എല്‍.ഡി.എഫിന് ആറ് സീറ്റുമാണ്. എന്നാല്‍, കോണ്‍ഗ്രസിലെ എ, ഐ വിഭാഗങ്ങള്‍ ചേരിതിരിഞ്ഞ് പോരിലായതോടെ അനിശ്ചിതത്വം തുടരുകയാണ്. ജില്ലയുടെ ചരിത്രത്തില്‍ ആദ്യമായി ബി.ജെ.പി നാല് പഞ്ചായത്തുകളുടെ ഭരണം പിടിച്ചെടുത്തു. ജില്ലാ പഞ്ചായത്തില്‍ ആദ്യമായി അക്കൗണ്ട് തുറന്നതും ഇവര്‍ക്ക് നേട്ടമായി. വെങ്ങാനൂര്‍, കല്ലിയൂര്‍ ഗ്രാമപഞ്ചായത്തുകളില്‍ ബി.ജെ.പി വ്യക്തമായ ഭൂരിപക്ഷത്തോടെയാണ് അധികാരത്തില്‍ എത്തിയത്. വിളവൂര്‍ക്കല്‍, മാറനല്ലൂര്‍ പഞ്ചായത്തുകളില്‍ നറുക്കെടുപ്പിലൂടെയാണ് ബി.ജെ.പി ഭരണം പിടിച്ചത്. പാറശ്ശാല, പെരുങ്കടവിള, നെടുമങ്ങാട്, വെള്ളനാട്, വാമനപുരം, കിളിമാനൂര്‍, ചിറയിന്‍കീഴ്, വര്‍ക്കല ബ്ളോക്കുകളാണ് എല്‍.ഡി.എഫ് നേടിയത്. അതിയന്നൂര്‍, നേമം ബ്ളോക്കുകള്‍ യു.ഡി.എഫ് സ്വന്തമാക്കി. എട്ട് സീറ്റുവീതം നേടി ഇരുമുന്നണിയും ഒപ്പത്തിനൊപ്പമത്തെിയ വെള്ളനാട് ബ്ളോക് നറുക്കെടുപ്പിലൂടെയാണ് ഇടതുമുന്നണിക്ക് ലഭിച്ചത്. ഇരുകൂട്ടരും ഏഴ് സീറ്റുവീതം നേടിയ നേമം നറുക്കെടുപ്പിലൂടെ യു.ഡി.എഫ് സ്വന്തമാക്കുകയായിരുന്നു. പെരുങ്കടവിള ബ്ളോക്കും നറുക്കെടുപ്പിലൂടെയാണ് എല്‍.ഡി.എഫ് നേടിയത്. ഇവിടെ എല്‍.ഡി.എഫ് ഏഴും യു.ഡി.എഫ് ആറും സീറ്റാണ് നേടിയത്. ഒരു സ്വതന്ത്രന്‍ യു.ഡി.എഫിന് പിന്തുണ നല്‍കിയതോടെ ഇരുകൂട്ടരും തുല്യമായി. തുടര്‍ന്ന് നറുക്കെടുപ്പ് നടത്തുകയായിരുന്നു. ആദ്യമായി ഒറ്റൂര്‍ പഞ്ചായത്ത് പിടിക്കാനായത് യു.ഡി.എഫിന് നേട്ടമായി. ഗ്രാമപഞ്ചായത്തുകളില്‍ പലയിടത്തും സ്വതന്ത്രരുടെയും ചെറുകക്ഷികളുടെയും പിന്തുണയോടെയാണ് മുന്നണികള്‍ ഭരണം പിടിച്ചത്. ചെമ്മരുതിയില്‍ ബി.എസ്.പി പിന്തുണയോടെയാണ് എല്‍.ഡി.എഫ് ഭരണം. എസ്.ഡി.പി.ഐയുടെ പിന്തുണയോടെയാണ് പാങ്ങോട് പഞ്ചായത്ത് യു.ഡി.എഫ് പിടിച്ചത്. ഇവിടെ എല്‍.ഡി.എഫ് ആറും യു.ഡി.എഫ് അഞ്ചും ബി.ജെ.പി നാലും എസ്.ഡി.പി.ഐ മൂന്നും വെല്‍ഫെയര്‍ പാര്‍ട്ടി ഒരു സീറ്റുമാണ് നേടിയത്. വലിയവയല്‍ വാര്‍ഡില്‍ വിജയിച്ച വെല്‍ഫെയര്‍ പാര്‍ട്ടിയുടെ പിന്തുണ ഇടതുമുന്നണിക്കായിരുന്നു. കരവാരം പഞ്ചായത്തില്‍ രണ്ടും തൊളിക്കോടും വെമ്പായത്തും ഒരോ സീറ്റ് വീതവും നേടിയ എസ്.ഡി.പി.ഐ ആണ് ചെറുപാര്‍ട്ടികളില്‍ മികച്ച പ്രകടനം കാഴ്ചവെച്ചത്. ജില്ലാ പഞ്ചായത്തില്‍ എല്‍.ഡി.എഫ് 19 ഉം യു.ഡി.എഫ് ആറും ബി.ജെ.പി ഒരു ഡിവിഷനിലും വിജയിച്ചു.