Top
Begin typing your search above and press return to search.
keyboard_arrow_down
Login
exit_to_app
exit_to_app
Homechevron_rightNewschevron_rightLocal Newschevron_rightThrissurchevron_rightപനയോലത്തൊപ്പിയുടെ...

പനയോലത്തൊപ്പിയുടെ കാവലാളായി സോമന്‍

text_fields
bookmark_border
കയ്പമംഗലം: കണ്ണൂര്‍ തൊട്ട് കൊല്ലം വരെയുള്ള മത്സ്യത്തൊഴിലാളികള്‍ക്ക് ഒഴിച്ചുകൂടാനാവാത്തതായിരുന്നു പനയോലത്തൊപ്പി. വെയിലിലും മഴയിലും സംരക്ഷണം നല്‍കിയിരുന്ന, പണവും വിലപ്പെട്ട വസ്തുക്കളും സൂക്ഷിച്ചിരുന്ന ആ തൊപ്പി നിർമിച്ചിരുന്നത് 'പെരിയജ്ഞാനികളുടെ' നാടായ പെരിഞ്ഞനത്തായിരുന്നു. വെസ്റ്റിലെ പടിഞ്ഞാറെക്കുറ്റ് കുടുംബത്തി​െൻറ പാരമ്പര്യ തൊഴിലായ തൊപ്പി നെയ്ത്തില്‍ ഇനി ശേഷിക്കുന്നത് ഒരാള്‍ മാത്രം.- 73 കാരനായ സോമന്‍. വല്ലപ്പോഴും കിട്ടുന്ന പനയോല കൊണ്ട് ആവശ്യക്കാര്‍ക്ക് തൊപ്പി നെയ്ത് കൊടുക്കുന്ന സോമ​െൻറ ആഗ്രഹം ഇത്രമാത്രം;- ത​െൻറ മരണം വരെയെങ്കിലും ഈ കുലത്തൊഴില്‍ അവസാനിക്കരുത്. നൂറ്റാണ്ട് മുമ്പ് കുടുംബത്തിലെ കാരണവർ പടിഞ്ഞാറെകുറ്റ് വേലാണ്ടി അരയനില്‍നിന്നാണ് സോമ​െൻറ അപ്പൂപ്പന്‍ കൊച്ചൂട്ടി തൊപ്പി നിർമാണം പഠിച്ചത്. 12 അണക്ക് തൊപ്പി വാങ്ങിയ കൊച്ചൂട്ടി പലതവണ അഴിച്ചും നെയ്തും നിർമാണം വശത്താക്കുകയായിരുന്നു. തൊപ്പിയുണ്ടാക്കാന്‍ ആദ്യം പനയോല വെട്ടിയുണക്കി അര സെ.മീ. വീതിയുള്ള നാരുകളാക്കുകയും ഇതുകൊണ്ട് ഒരിഞ്ച് കനത്തില്‍ നാട (തെറ്റ) നെയ്യുകയും ചെയ്യും. 18 നാരുകള്‍ കൂട്ടിക്കെട്ടിയാണ് ഒരു തൊപ്പിക്കുള്ള നാട നെയ്യുന്നത്. പണ്ടെങ്ങോ വീട്ടുപറമ്പില്‍ ഉണ്ടായിരുന്ന ഞെട്ടിക്കുഴിയന്‍ മാവി​െൻറ വേരില്‍ നിന്നെടുത്ത, ഒരു ചാണ്‍ നീളവും ഒരു ഉള്ളന്‍ കൈ വീതിയുമുള്ള മരമുട്ടിയാണ് തൊപ്പിയുടെ 'അച്ച്' എന്ന് പറയുന്നത്. പിതാവ് ഉപയോഗിച്ചിരുന്ന അച്ച് തന്നെയാണ് സോമന്‍ ഇപ്പോഴും ഉപയോഗിക്കുന്നത്. 14 ഇഞ്ച് വീതം നീളവും വീതിയുമുള്ള തൊപ്പി 43 ഇഞ്ച്‌ ചുറ്റളവും മധ്യത്തില്‍ നാല് ഇഞ്ചിലധികം കുഴിഞ്ഞതുമാണ്. തലയില്‍ ഇറങ്ങിയിരിക്കാന്‍ മാത്രമില്ലാത്ത ഈ കുഴിയില്‍ പ്ലാസ്റ്റിക് കവറില്‍ പൊതിഞ്ഞാണ് പണം, മുറുക്കാന്‍, ബീഡി, തീപ്പെട്ടി തുടങ്ങിയവ സൂക്ഷിക്കുക. കുഴിയില്‍നിന്ന് താഴേക്ക് ഞാത്തിയിട്ട വള്ളി കഴുത്തില്‍ കുടുക്കിയിടാന്‍ പാകത്തിലുള്ളതാണ്. മൂന്നുകൊല്ലം വരെ കേടുകൂടാതെ ഇരിക്കുന്ന തൊപ്പി നല്ല വായുസഞ്ചാരമുള്ളതും വെയില്‍ വരുന്ന ദിശയിലേക്ക് സൗകര്യം പോലെ തിരിച്ചുവെക്കാന്‍ പറ്റുന്നതുമാണ്. മത്സ്യത്തൊഴിലാളികള്‍ക്ക് ഒഴിച്ചുകൂടാന്‍ പറ്റാത്ത ഒന്നായി തൊപ്പി മാറിയതോടെ പഴയകാലത്ത് പോലും നല്ല വില ലഭിച്ചിരുന്നു. 60 കൊല്ലം മുമ്പ്, നാല് ചില്ലിക്ക് (ഷില്ലി) ഒരാഴ്ചത്തെ റേഷനരിയും ഒരണക്ക് ഒരുകൊട്ട കപ്പയും കിട്ടിയിരുന്ന കാലത്ത് അഞ്ചു രൂപക്കാണ് തൊപ്പി വിറ്റിരുന്നത്. കണ്ണൂര്‍ തൊട്ട് കൊല്ലം വരെയുള്ള ആവശ്യക്കാര്‍ അന്വേഷിച്ചെത്തി മുന്‍‌കൂര്‍ പണം നല്‍കി തൊപ്പി വാങ്ങിയിരുന്നു. കോഴിക്കോട്, പൊന്നാനി, ചേറ്റുവ, നാട്ടിക തുടങ്ങിയ വടക്കന്‍ ഭാഗങ്ങളായിരുന്നു പ്രധാന വില്‍പന കേന്ദ്രങ്ങള്‍. അഞ്ചും ആറും ആളുകള്‍ ഒന്നിച്ചിരുന്ന് വിശ്രമമില്ലാതെ നെയ്താല്‍ ആഴ്ചയില്‍ 200 തൊപ്പി വരെ വിൽക്കാമായിരുന്നു. ഇന്നാകട്ടെ പ്രതിദിനം ഒരെണ്ണം പോലും പൂര്‍ത്തിയാക്കാന്‍ കഴിയുന്നില്ല. പ്ലാസ്റ്റിക് തൊപ്പികള്‍ വ്യാപകമായതോടെ പ്രകൃതിദത്തമായ ഈ തൊപ്പിക്ക് പരമാവധി കിട്ടുന്നത് 200 രൂപ മാത്രം. 'ചെമ്മീന്‍' സിനിമയുടെ ഷൂട്ടിങ് നാട്ടിക കടപ്പുറത്ത് നടക്കവെ, സിനിമയുടെ ആളുകള്‍ അന്വേഷിച്ചെത്തിയതും ഒരു തൊപ്പിക്ക് 10 രൂപ നിരക്കില്‍ 50 തൊപ്പികള്‍ നിർമിച്ച് നൽകിയതും സോമന്‍ അഭിമാനത്തോടെ ഓര്‍ക്കുന്നു. സത്യൻ അടക്കമുള്ള താരങ്ങള്‍ ഈ തൊപ്പിയാണ് സിനിമയില്‍ ധരിച്ചത്. സോമ​െൻറ മക്കളാരും തൊപ്പി നെയ്ത്ത് തൊഴിലാക്കിയിട്ടില്ല.
Show Full Article
TAGS:LOCAL NEWS 
Next Story