Top
Begin typing your search above and press return to search.
keyboard_arrow_down
Login
exit_to_app
exit_to_app
Homechevron_rightNewschevron_rightLocal Newschevron_rightPathanamthittachevron_rightവികസനം തൊട്ടുതീണ്ടാതെ ...

വികസനം തൊട്ടുതീണ്ടാതെ പന്തളം കെ.എസ്.ആര്‍.ടി.സി ബസ്സ്റ്റേഷന്‍

text_fields
bookmark_border
പന്തളം: വളര്‍ന്നുവളര്‍ന്ന് പന്തളം കെ.എസ്.ആര്‍.ടി.സി ബസ്സ്റ്റേഷന്‍ പടവലങ്ങ പോലെ. 1983ല്‍ സബ്ഡിപ്പോ ആയി പ്രവര്‍ത്തനം ആരംഭിച്ച ബസ്സ്റ്റേഷന്‍ ഇപ്പോള്‍ ഓപറേറ്റിങ് സെന്‍ററായി മാറി. ഇതോടൊപ്പം പ്രവര്‍ത്തനം ആരംഭിച്ച അടൂര്‍ ഡിപ്പോ ഇപ്പോള്‍ ഡി.ടി.ഒ ഓഫിസായി. തുടക്കത്തില്‍ 28 ബസുകളുമായി സര്‍വിസ് ആരംഭിച്ച ഡിപ്പോയില്‍ ഇപ്പോള്‍ 17 എണ്ണമാണുള്ളത്. ഇവയില്‍ പലതും സര്‍വിസ് നടത്താന്‍ കഴിയുന്ന തരത്തിലുമല്ല. പന്തളം ഗ്രാമപഞ്ചായത്ത് 1983ല്‍ വാങ്ങി നല്‍കിയ 3.2 ഏക്കര്‍ സ്ഥലത്താണ് ഡിപ്പോ പ്രവര്‍ത്തിക്കുന്നത്. കെ.എസ്.ആര്‍.ടി.സി രണ്ടു വര്‍ഷം മുമ്പ് 18 ലക്ഷം രൂപ അനുവദിച്ച് ഗാരേജ് നിര്‍മിച്ചതല്ലാതെ ഇതുവരെ ഒരു ഫണ്ടും ഡിപ്പോക്ക് നല്‍കിയിട്ടില്ല. പണി തീരാത്ത ഗാരേജാകട്ടെ മഴപെയ്താല്‍ ചോര്‍ന്നൊലിക്കും. തൊഴിലാളികള്‍ക്ക് ഇരിക്കുന്നതിനോ പ്രാഥമിക കൃത്യങ്ങള്‍ നിര്‍വഹിക്കുന്നതിനോ കഴിയാത്ത സ്ഥിതിയാണ്. തുടക്കത്തില്‍ സ്റ്റേഷന്‍മാസ്റ്ററും ഡിപ്പോ എന്‍ജിനീയറും ഉണ്ടായിരുന്ന ഇവിടെ 32 വര്‍ഷത്തെ വികസനം മൂലം ഇപ്പോള്‍ ഇന്‍സ്പെക്ടര്‍ മാത്രമാണുള്ളത്. അതുതന്നെ രണ്ടുപേര്‍ വേണ്ടിടത്ത് ഒരാള്‍ മാത്രം. ജീവനക്കാര്‍ ആവശ്യത്തിനില്ല. 140 ജീവനക്കാര്‍ വേണ്ടിടത്ത് 115 പേരാണുള്ളത്. ശബരിമലയുമായി ബന്ധപ്പെട്ട് ഏറെ പ്രാധാന്യമുള്ള പന്തളത്തുനിന്ന് ഒരു സര്‍വിസ് മാത്രമാണ് പമ്പയിലേക്കുള്ളത്. അതുതിരിച്ച് പന്തളത്ത് എത്താതെ നേരിട്ട് തിരുവനന്തപുരത്തിന് പോകും. അഞ്ചു ഫാസ്റ്റ് സര്‍വിസും 12 ഓര്‍ഡിനറി സര്‍വിസുമാണ് നിലവില്‍ പന്തളത്തുനിന്ന് ഓപറേറ്റ് ചെയ്യുന്നത്. ഇതില്‍ രണ്ടു ഫാസ്റ്റ് സര്‍വിസ് നടത്തുന്ന ബസുകള്‍ കട്ടപ്പുറത്തായിട്ട് രണ്ടു മാസത്തിലേറെയായി. ബസുകള്‍ നന്നാക്കുന്നതിന് ആവശ്യമായ ടൂള്‍സും ഇവിടെ ലഭ്യമല്ല. രണ്ടു വര്‍ഷം മുമ്പ് ടാറിങ് നടത്തിയ ബസ്സ്റ്റാന്‍ഡ് ഉടന്‍ കുളമായി. രമേശ് ചെന്നിത്തല എം.പി ആയിരുന്ന കാലത്ത് 12 ലക്ഷം രൂപ മുടക്കി നിര്‍മിച്ച ഓഫിസ് കെട്ടിടം സ്റ്റാന്‍ഡിന്‍െറ നടുക്ക് ഏറുമാടം പോലെയാണ് നിര്‍മിച്ചിട്ടുള്ളത്. ഡിപ്പോ ആരംഭിക്കുന്ന അവസരത്തില്‍ പന്തളം പഞ്ചായത്ത് നിര്‍മിച്ച് നല്‍കിയ കെട്ടിടത്തിലാണ് ഓഫിസിന്‍െറ പല വിഭാഗവും പ്രവര്‍ത്തിക്കുന്നത്. ഈ കെട്ടിടമാകട്ടെ ഏതു നിമിഷവും നിലംപൊത്തുന്ന അവസ്ഥയിലുമാണ്. പുതുക്കിപ്പണിയണമെന്ന് നിരന്തരം ആവശ്യമുന്നയിച്ചിട്ടും കെ.എസ്.ആര്‍.ടി.സി മാനേജ്മെന്‍റ് പുറംതിരിഞ്ഞുനില്‍ക്കുകയാണ്. ബസ്സ്റ്റാന്‍ഡില്‍ എത്തുന്നവര്‍ക്കും ജീവനക്കാര്‍ക്കും പ്രാഥമിക കൃത്യം നിര്‍വഹിക്കാന്‍ കഴിയാത്ത ഏകസ്റ്റാന്‍ഡ് പന്തളം സ്റ്റാന്‍ഡായിരിക്കും. ഉണ്ടായിരുന്ന കംഫര്‍ട്ട് സ്റ്റേഷന്‍ തകര്‍ന്നുവീണതോടെയാണ് ഈ ദുരവസ്ഥക്ക് കാരണം. രണ്ടു വര്‍ഷം മുമ്പ് നിര്‍മല്‍ പുരസ്കാരം ലഭിച്ചതിനെ തുടര്‍ന്ന് പന്തളം ബ്ളോക് പഞ്ചായത്ത് സ്റ്റാന്‍ഡില്‍ ഒരു കംഫര്‍ട്ട് സ്റ്റേഷന്‍ പണിതു നല്‍കി. എന്നാല്‍, ഇതുവരെ അത് തുറന്നുനല്‍കാന്‍ കെ.എസ്.ആര്‍.ടി.സിക്ക് കഴിഞ്ഞിട്ടില്ല. രണ്ടേക്കറോളം സ്ഥലം കാടുകയറി ഇഴജന്തുക്കളുടെയും തെരുവുനായ്ക്കളുടെയും വിഹാരകേന്ദ്രമാണ്. രാത്രി ഇവിടെ യാത്രക്കാര്‍ എത്താറില്ല. ഒരു പ്രയോജനമില്ലാതെ കാടുകയറി കിടക്കുന്ന സ്ഥലം പാട്ടമെടുത്ത് കൃഷി ചെയ്യാന്‍ മാനേജ്മെന്‍റ് ചോദിക്കുന്നത് ഭീമമായ തുകയാണ്. ചിറ്റയം ഗോപകുമാര്‍ എം.എല്‍.എയുടെ ഫണ്ടില്‍നിന്നനുവദിച്ച് വാങ്ങിയ ബസ് ഡിപ്പോയില്‍ ലഭിച്ചെങ്കിലും അത് സര്‍വിസ് നടത്താന്‍ റൂട്ട് ലഭ്യമാക്കാന്‍ മാനേജ്മെന്‍റ് ഇതുവരെ നടപടി സ്വീകരിച്ചിട്ടില്ല. ഇപ്പോള്‍ കൊട്ടാരക്കര-ചെങ്ങന്നൂര്‍ റൂട്ടില്‍ സര്‍വിസ് നടത്തുകയാണ് ഈ ബസ്.
Show Full Article
TAGS:
Next Story