കാറും ഓട്ടോറിക്ഷയും കൂട്ടിയിടിച്ച് എട്ട്​ പേർക്ക് പരിക്ക്​

ഷൊർണൂർ: കാറും ഓട്ടോറിക്ഷയും കൂട്ടിയിടിച്ച് എട്ട് പേർക്ക് പരിക്കേറ്റു. ചൊവ്വാഴ്ച വൈകീട്ട് അഞ്ചോടെ സംസ്ഥാനപാതയിൽ ഷൊർണൂർ എസ്.എം.പി ജങ്ഷനടുത്തുള്ള റെയിൽവേ മേൽപ്പാലത്തിന് സമീപമാണ് അപകടം. ഇടിയുടെ ആഘാതത്തിൽ ഓട്ടോറിക്ഷ 15 അടി താഴ്ചയിലേക്ക് മറിഞ്ഞു. തൃശൂർ ഭാഗത്തേക്ക് പോവുകയായിരുന്ന കാറും ആറ്റൂരിൽനിന്ന് ഷൊർണൂരിലേക്ക് വരികയായിരുന്ന ഓട്ടോറിക്ഷയുമാണ് കൂട്ടിയിടിച്ചത്. ഓട്ടോറിക്ഷയിൽ യാത്രക്കാരടക്കം നാലുപേരും കാറിൽ നാല് പേരും ഉണ്ടായിരുന്നതായാണ് ദൃക്സാക്ഷികൾ പറഞ്ഞത്. ഓട്ടോറിക്ഷ തലകീഴായി മറിഞ്ഞതിനാൽ ഇതിലുള്ളവർക്ക് സാരമായി പരിക്കേറ്റു. ഇവരെ തൃശൂർ മെഡിക്കൽ കോളജ് ആശുപത്രിയിലേക്ക് കൊണ്ടുപോയി. കാറിലുള്ളവർക്ക് നിസ്സാര പരിക്കാണുള്ളത്.