വാഹനങ്ങൾ നിർത്തുന്നതിനെച്ചൊല്ലി തർക്കം പതിവ്​

തിരൂരങ്ങാടി: വാഹനങ്ങൾ നിർത്തുന്നതിനെച്ചൊല്ലി തർക്കം പതിവാകുന്നു. ദേശീയപാത തലപ്പാറ ജങ്ഷനിലെ സ്വകാര്യ ബേക്കറി കൂൾബാറിന്‌ മുൻവശത്താണ് സ്ഥിരമായി തർക്കം ഉടലെടുക്കുന്നത്. ദേശീയപാതയോരത്ത് പാർക്ക് ചെയ്യുന്ന ഇരുചക്രവാഹനങ്ങൾ കടയുടമകൾ സ്ഥാനം മാറ്റിയിടുന്നതാണ് തർക്കത്തിൽ കലാശിക്കുന്നത്. സ്ഥാപനത്തി​െൻറ മുൻഭാഗത്തിനുപുറമെ ദേശീയപാതയോരം മീറ്ററുകളോളം കോൺക്രീറ്റ് ചെയ്തിട്ടുണ്ട്. ഇവിടെ പാർക്ക് ചെയ്യുന്ന ഇരുചക്രവാഹനങ്ങളാണ് കടയുടമകൾ മാറ്റിയിടുന്നത്. തങ്ങളുടെ പാർക്കിങ് സ്ഥലമാണെന്നാണ് കടയുടമയുടെ വാദം. എന്നാൽ, സ്ഥാപനത്തി​െൻറ മുൻഭാഗം ഒഴിച്ചുള്ള സ്ഥലത്തെ പാർക്കിങ് തടയാൻ കടയുടമകൾക്ക് അധികാരമില്ലെന്നാണ് ജനങ്ങൾ പറയുന്നത്. കടയുടമ ഇതേ അവസ്ഥ തുടരുന്നപക്ഷം നിയമനടപടികളുമായി മുന്നോട്ടുപോകാനാണ് നാട്ടുകാരുടെ തീരുമാനം.