മരുതുംകാട്ടിൽ പുലി വളർത്തുപട്ടിയെ കൊന്നു; മലമ്പ്രദേശം ഭീതിയിൽ

കല്ലടിക്കോട്: മലയോര മേഖലയിൽ വീണ്ടും പുലിയിറങ്ങി വളർത്തുപട്ടിയെ കൊന്നുതിന്നു. കരിമ്പ ഗ്രാമപഞ്ചായത്തിലെ മൂന്നേക്കറിനടുത്ത് മരുതംകാട് പഴയ ജി.എൽ.പി സ്കൂൾ കെട്ടിടത്തി​െൻറ പരിസരങ്ങളിലും കല്ലംകുന്നിലുമാണ് ഉൾക്കാട്ടിൽനിന്ന് ഇറങ്ങിവന്ന പുലി രാത്രിയിൽ സ്വതന്ത്രവിഹാരം നടത്തുന്നത്. ശനിയാഴ്ച രാത്രി 9.30ഓടെ മൂന്നേക്കർ കാവുങ്കൽ സുമതിയുടെ വളർത്തുപട്ടിയെ പിടിച്ച് കൊണ്ടുപോയി കൊന്നുതിന്നതാണ് ഒടുവിലത്തെ സംഭവം. വീടി​െൻറ വരാന്തയിൽ നിന്നാണ് പട്ടിയെ പിടിച്ചത്. കഴിഞ്ഞമാസം മൂന്നേക്കറിലും പരിസരങ്ങളിലുമായി മൂന്ന് വളർത്ത് ആടുകളെ പുലി കൊന്നിരുന്നു. പുലിയുടെ സാന്നിധ്യം മലയോര മേഖലയിൽ ഭീതി വർധിപ്പിച്ചു.