പാണ്ടിക്കാട് പി.എച്ച്.സി ഫാമിലി ഹെൽത്ത് സെൻറർ ആക്കുന്നു

പാണ്ടിക്കാട്: പ്രാഥമികാരോഗ്യ കേന്ദ്രത്തെ ഫാമിലി ഹെൽത്ത് സ​െൻററായി ഉയർത്തുന്നു. നവകേരള മിഷൻ ആർദ്രം പദ്ധതിയുടെ ഭാഗമായി നിയോജക മണ്ഡലത്തിൽ നിന്ന് ഒരു പ്രാഥമികാരോഗ്യകേന്ദ്രത്തെ ഫാമിലി ഹെൽത്ത് സ​െൻററാക്കുന്നതി​െൻറ ഭാഗമായാണ് മഞ്ചേരി നിയോജക മണ്ഡലത്തിൽ നിന്ന് പാണ്ടിക്കാട് പി.എച്ച്.സിയെ തെരഞ്ഞെടുത്തത്. ജില്ലയിൽ ആദ്യഘട്ടത്തിൽ ഫാമിലി ഹെൽത്ത് സ​െൻററുകളായി പ്രഖ്യാപിച്ച രണ്ട് പ്രാഥമികാരോഗ്യ കേന്ദ്രങ്ങളിൽ ഒന്നാണ് പാണ്ടിക്കാട്ടേത്. കാഷ് അക്രഡിറ്റേഷൻ നേടിയതാണ് പാണ്ടിക്കാട് പി.എച്ച്.സിക്ക് പ്രഥമ പരിഗണന ലഭിക്കാൻ ഇടയായത്. ഫാമിലി ഹെൽത്ത് സ​െൻററായി ഉയർത്തുന്നതിനായി എൻ.എച്ച്.എം പദ്ധതിയിൽ ഉൾപ്പെടുത്തി ഒരു ഡോക്ടർ, രണ്ട് സ്റ്റാഫ് നഴ്സ്, ഒരു ലാബ് ടെക്നീഷ്യൻ എന്നിവരെ കേന്ദ്രത്തിൽ അധികമായി നിയമിച്ചിട്ടുണ്ട്. ആഗസ്റ്റ് 17 ന് പ്രഖ്യാപന ഉദ്ഘാടനം നടക്കും. ഫാമിലി ഹെൽത്ത് സ​െൻററായി ഉയർത്തുന്നതിനുള്ള ഒരുക്കങ്ങൾ വിലയിരുത്താനായി അഡ്വ. എം. ഉമ്മർ എം.എൽ.എയുടെ അധ്യക്ഷതയിൽ യോഗം ചേർന്നു. ഗ്രാമപഞ്ചായത്ത് പ്രസിഡൻറ് കെ.പി. പ്രേമലത, ജില്ല പഞ്ചായത്തംഗം ആലിപ്പറ്റ ജമീല, ബ്ലോക്ക്, ഗ്രാമപഞ്ചായത്തംഗങ്ങൾ എന്നിവർ പങ്കെടുത്തു.