പുല്‍പ്പറ്റയെ സമ്പൂര്‍ണപ്രതിരോധ ഗ്രാമപഞ്ചായത്താക്കി മാറ്റുന്നു

മഞ്ചേരി: പുല്‍പ്പറ്റയെ സമ്പൂര്‍ണ രോഗപ്രതിരോധ ഗ്രാമപഞ്ചായത്താക്കി മാറ്റാനുള്ള ശ്രമം തുടങ്ങി. ഇതിന്‍െറ ഭാഗമായി തൃപ്പനച്ചി പ്രാഥമികാരോഗ്യ കേന്ദ്രത്തില്‍ ഗ്രാമപഞ്ചായത്ത് ഭരണസമിതി, ആരോഗ്യ പ്രവര്‍ത്തകര്‍, സാമൂഹിക നീതി വകുപ്പ് പ്രവര്‍ത്തകര്‍ എന്നിവരുടെ സംയുക്ത യോഗം ചേര്‍ന്നു. രാഷ്ട്രീയ യുവജന പ്രസ്ഥാനങ്ങളുടെയും സന്നദ്ധ സംഘടനകളുടെയും ക്ളബുകളുടെയും സഹകരണത്തോടെ ഒക്ടോബര്‍ ഒന്ന് മുതല്‍ 10 വരെ മുഴുവന്‍ വാര്‍ഡുകളിലും പ്രത്യേക പ്രതിരോധ കുത്തിവെപ്പ് ക്യാമ്പുകള്‍ സംഘടിപ്പിക്കും. കൂടാതെ 28ന് തിങ്കളാഴ്ച മുതല്‍ ഒരാഴ്ച പ്രതിരോധ കുത്തിവെപ്പ് കുറവുള്ള കുട്ടികളുടെ വീടുകളില്‍ സന്ദര്‍ശനം നടത്താനും യോഗം തീരുമാനിച്ചു. പ്രസിഡന്‍റ് ഒ.പി. ആലിബാപ്പു ഉദ്ഘാടനം ചെയ്തു. വൈസ്പ്രസിഡന്‍റ് നസ്രീദ മോള്‍ അധ്യക്ഷത വഹിച്ചു. മെഡിക്കല്‍ ഓഫിസര്‍ ഡോ. ഷബീറലി, എം. ഷാഹുല്‍ഹമീദ്, ആരോഗ്യ സ്ഥിരംസമിതി അധ്യക്ഷന്‍ ഇ. അബൂബക്കര്‍, വാര്‍ഡംഗം പി.സി. അബ്ദുറഹ്മാന്‍, ഐ.സി.ഡി.എസ് സൂപ്പര്‍വൈസര്‍ ഷാജിത ആറ്റശ്ശേരി, നഴ്സുമാരായ കനകലത, ഷീബ വി. ടോം എന്നിവര്‍ സംസാരിച്ചു.