ജാനകിക്കാടിനു സമീപം പുഴയിലെ തുരുത്തിൽ കുടുങ്ങിയവരെ രക്ഷിച്ചു

കുറ്റ്യാടി: ജാനകിക്കാടിനു സമീപം കുറ്റ്യാടിപ്പുഴയിലെ ചവറൻമുഴി തുരുത്തിൽ കുടുങ്ങിയവരെ ഫയർഫോഴ്​സ് രക്ഷിച്ചു. ബുധനാഴ്​ച വൈകീട്ട് എത്തിയ മൂന്നു പേർ ചൂണ്ടയിടുന്നതിനിടെ  പുഴയിൽ പെട്ടെന്ന് വെള്ളം പൊങ്ങുകയായിരുന്നു. ചങ്ങരോത്ത് മേമണ്ണിൽ ജെയ്​സൺ (25), കല്ലോട്    പൊളോറച്ചാലിൽ ജിഷ്​ണു (24), പന്തിരിക്കര വേങ്ങേരി ആശിഖ് (25) എന്നിവരെയാണ് രക്ഷിച്ചത്. തുരുത്ത് മുങ്ങിയതോടെ മരത്തിൽ കയറിപ്പറ്റി. ഇവർതന്നെ  വിവരം പേരാമ്പ്ര ഫയർഫോഴ്‌സിൽ വിളിച്ചറിയിച്ചു.
സ്​റ്റേഷൻ ഓഫിസർ ജാഫർ സാദിഖി​​െൻറ നേതൃത്വത്തിലെത്തിയ സംഘമാണ് വടവും ലൈഫ്ബോയിയും ഉപയോഗിച്ച് കരക്കെത്തിച്ചത്. രണ്ട് ഭടന്മാർ സാഹസികമായി തുരുത്തിലേക്ക് നീന്തിയാണ് വടം സ്ഥാപിച്ചത്. ഏഴു മണിയോടെയാണ് കരക്കെത്തിച്ചത്. ഉച്ചക്ക് ഇടതടവില്ലാതെ പെയ്യുന്ന മഴയിൽ പുഴ കരകവിഞ്ഞ് ജാനകിക്കാട് റോഡിൽ വെള്ളം കയറിയിരുന്നു.