വി.എച്ച്.എസ്.ഇ വിദ്യാർഥികൾക്ക് സൗജന്യ എൻട്രൻസ് പരിശീലനം

കൊയിലാണ്ടി: വൊക്കേഷനൽ ഹയർ സെക്കൻഡറി വകുപ്പ് രണ്ടാം വർഷ വി.എച്ച്.എസ്.ഇ വിദ്യാർഥികൾക്കായി ആരംഭിച്ച സൗജന്യ എൻട്രൻസ് പരിശീലന ക്ലാസുകൾ കൊയിലാണ്ടി വൊക്കേഷനൽ ഹയർ സെക്കൻഡറി സ്കൂളിൽ കെ. ദാസൻ എം.എൽ.എ ഉദ്ഘാടനം ചെയ്തു. കോച്ചിങ് ക്ലാസുകൾ ഏപ്രിൽ വരെയാണ് ക്രമീകരിച്ചിട്ടുള്ളത്. സംസ്ഥാനത്ത് കോഴിക്കോട്, തിരുവനന്തപുരം ജില്ലകളിലാണ് ആദ്യഘട്ടത്തിൽ പദ്ധതി നടപ്പാക്കുന്നത്. ജില്ലയിലെ വി.എച്ച്.എസ്.ഇകളിൽ നിന്ന് തെരഞ്ഞെടുത്ത 66 കുട്ടികളാണ് പരിശീലനം നേടുന്നത്. സൗജന്യ ഭക്ഷണവും യാത്രാബത്തയും നൽകും. നഗരസഭ ചെയർമാൻ കെ. സത്യൻ അധ്യക്ഷത വഹിച്ചു. വി.എച്ച്.എസ്.ഇ അസി. ഡയറക്ടർ എം. ശെൽവമണി, നഗരസഭ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ കെ. ഷിജു, കൗൺസിലർ മാങ്ങോട്ടിൽ സുരേന്ദ്രൻ, പ്രിൻസിപ്പൽ ബിജേഷ് ഉപ്പാലക്കൽ, പി.ടി.എ പ്രസിഡൻറ് പി. പ്രശാന്ത്, ഹയർ സെക്കൻഡറി പ്രിൻസിപ്പൽ പി. വത്സല, ഹെഡ്മാസ്റ്റർ പി.എ. പ്രേമചന്ദ്രൻ, കെ. അമ്പിളി, സംഗീത എന്നിവർ സംസാരിച്ചു.