ശക്തമായ മഴപെയ്യുന്നതിനിടെ നിറഞ്ഞുനിൽക്കുന്ന കിണറിലെ വെള്ളം വറ്റിവരണ്ടു, ആശങ്കയിൽ നാട്ടുകാർ

* പ്രതിഭാസം വെള്ളപ്പൊക്ക ബാധിത പ്രദേശത്ത് ഫറോക്ക്: നിറയെ വെള്ളമുണ്ടായിരുന്ന 20 കോൽ താഴ്ചയുള്ള കിണറ്റിലെ വെള്ളം വറ്റിവരണ്ടത് നാട്ടുകാരെ ആശങ്കയിലാഴ്ത്തി. പരുത്തിപ്പാറ വി.എം. ഇസ്മയിൽ സലീമി​െൻറ വിട്ടുകിണറ്റിലാണ് അപൂർവ പ്രതിഭാസം. വ്യാഴാഴ്ച വൈകുന്നേരമാണ് കിണറിൽ വെള്ളം കുറയുന്നതായി വീട്ടുകാരുടെ ശ്രദ്ധയിൽപെട്ടത്. നിമിഷങ്ങൾക്കുള്ളിൽ നിറഞ്ഞുനിന്നിരുന്ന കിണർ വറ്റിവരണ്ടു. വീട്ടുപറമ്പിലെ മറ്റൊരു കിണറിൽ നിറയെ വെള്ളമുണ്ട്. ഉയർന്ന പ്രദേശത്തുള്ള ഈ കിണറിന് ഏതാനും മീറ്ററുകൾ താഴെയുള്ള വയലിൽ ചാലിയാർ കരകവിഞ്ഞൊഴുകിയതിനാൽ വെള്ളം ക്രമാതീതമായി ഉയരുന്നതിനിടയിലാണ് കിണർ വറ്റിവരണ്ടത്. കിണർ കാണാൻ നിരവധി നാട്ടുകാർ സ്ഥലത്തെത്തി. കിണർ ഇടിയുമെന്ന ആശങ്കയുള്ളതിനാൽ നാട്ടുകാർ കയർകെട്ടി തിരിച്ചു. വീട്ടുകാർ ബന്ധുവീട്ടിലേക്ക് താമസം മാറിയിരിക്കുകയാണ്.