കോട്ടയം ജില്ലാ പഞ്ചായത്ത് : പ്രസിഡന്‍റ് ജോഷി ഫിലിപ്പ്, മേരി സെബാസ്റ്റ്യന്‍ വൈസ് പ്രസിഡന്‍റ്

കോട്ടയം: കോണ്‍ഗ്രസിലെ ജോഷി ഫിലിപ്പിനെ കോട്ടയം ജില്ലാ പഞ്ചായത്ത് പ്രസിഡന്‍റായും കേരള കോണ്‍ഗ്രസ് -എമ്മിലെ മേരി സെബാസ്റ്റ്യനെ വൈസ് പ്രസിഡന്‍റായും തെരഞ്ഞെടുത്തു. ആകെ 22ല്‍ 14 വോട്ട് നേടിയാണ് വാകത്താനം ഡിവിഷനെ പ്രതിനിധാനം ചെയ്യുന്ന ജോഷി ഫിലിപ്പ് വിജയിച്ചത്. കേരള കോണ്‍ഗ്രസിലെ ആറ് അംഗങ്ങളും കോണ്‍ഗ്രസിലെ എട്ട് അംഗങ്ങളും അനുകൂലമായി വോട്ട് ചെയ്തു. എല്‍.ഡി.എഫിലെ എതിര്‍സ്ഥാനാര്‍ഥി മുണ്ടക്കയം ഡിവിഷനിലെ കെ. രാജേഷിന് എട്ടു വോട്ട് ലഭിച്ചു. സി.പി.എമ്മിലെ ആറുപേരുടെയും സി.പി.ഐയിലെയും കേരള കോണ്‍ഗ്രസ് സെക്കുലറിലെയും ഒന്നു വീതം അംഗങ്ങളുടെയും പിന്തുണ എല്‍.ഡി.എഫിന് കിട്ടി. ഉച്ചക്കുശേഷം നടന്ന വൈസ് ചെയര്‍മാന്‍ തെരഞ്ഞെടുപ്പില്‍ കടുത്തുരുത്തി ഡിവിഷനെ പ്രതിനിധാനം ചെയ്യുന്ന കേരള കോണ്‍ഗ്രസിലെ മേരി സെബാസ്റ്റ്യന്‍ 14 വോട്ടുനേടി വിജയിച്ചു. എല്‍.ഡി.എഫ് സ്ഥാനാര്‍ഥി പൂഞ്ഞാര്‍ ഡിവിഷനിലെ പ്രതിനിധി കേരള കോണ്‍ഗ്രസ് സെക്കുലറിലെ ലിസി സെബാസ്റ്റ്യന് എട്ടു വോട്ടും കിട്ടി. ജില്ലാ കലക്ടര്‍ യു.വി. ജോസ് ജോഷി ഫിലിപ്പിന് സത്യപ്രതിജ്ഞ ചൊല്ലിക്കൊടുത്തു. എ.ഡി.എം മോന്‍സി പി. അലക്സാണ്ടര്‍, അസി. കലക്ടര്‍ ദിവ്യ എസ്. അയ്യര്‍ എന്നിവരും സന്നിഹിതരായിരുന്നു. മേരി സെബാസ്റ്റ്യന് ജോഷി ഫിലിപ്പ് സത്യപ്രതിജ്ഞ ചൊല്ലിക്കൊടുത്തു. യു.ഡി.എഫ് ധാരണയനുസരിച്ച് ആദ്യ രണ്ടര വര്‍ഷം കോണ്‍ഗ്രസിന് പ്രസിഡന്‍റ് സ്ഥാനവും കേരള കോണ്‍ഗ്രസിന് വൈസ് പ്രസിഡന്‍റ് സ്ഥാനവും നല്‍കും. തുടര്‍ന്നുള്ള രണ്ടര വര്‍ഷം കേരള കോണ്‍ഗ്രസിന് പ്രസിഡന്‍റ് സ്ഥാനവും കോണ്‍ഗ്രസിന് വൈസ് പ്രസിഡന്‍റ് സ്ഥാനവും ലഭിക്കും. രണ്ടാംഘട്ടത്തില്‍ കേരള കോണ്‍ഗ്രസിന് ലഭിക്കുന്ന പ്രസിഡന്‍റ് സ്ഥാനത്തില്‍ ആദ്യ ഒന്നേകാല്‍ വര്‍ഷം കുറവിലങ്ങാട് ഡിവിഷനിലെ സക്കറിയാസ് കുതിരവേലിയും തുടര്‍ന്ന് കാഞ്ഞിരപ്പള്ളി ഡിവിഷനിലെ സെബാസ്റ്റ്യന്‍ കുളത്തുങ്കലും പ്രസിഡന്‍റാകും. അനുമോദന സമ്മേളനത്തില്‍ മന്ത്രി കെ.സി. ജോസഫ്, കെ.പി.സി.സി ജനറല്‍ സെക്രട്ടറി ലതിക സുഭാഷ്, കെ.പി.സി.സി സെക്രട്ടറിമാരായ ഫിലിപ്പ് ജോസഫ്, പി.എസ്. സലീം, നാട്ടകം സുരേഷ്, ഡി.സി.സി പ്രസിഡന്‍റ് ടോമി കല്ലാനി, മുന്‍ ജില്ലാ പഞ്ചായത്ത് പ്രസിഡന്‍റ് രാധ വി. നായര്‍ എന്നിവര്‍ പങ്കെടുത്തു. 1986ല്‍ ചങ്ങനാശേരി എസ്.ബി കോളജില്‍ കെ.എസ്.യു യൂനിറ്റ് പ്രസിഡന്‍റായാണ് ജോഷി ഫിലിപ്പ് രാഷ്ട്രീയത്തിലേക്ക് പ്രവേശിക്കുന്നത്. യൂത്ത് കോണ്‍ഗ്രസ് വാകത്താനം മണ്ഡലം പ്രസിഡന്‍റ്, കോണ്‍ഗ്രസ് വാഴൂര്‍ ജനറല്‍ സെക്രട്ടറി, യൂത്ത് കോണ്‍ഗ്രസ് ജില്ലാ വൈസ് പ്രസിഡന്‍റ്, ഡി.സി.സി ജനറല്‍ സെക്രട്ടറി എന്നീ പദവികള്‍ വഹിച്ചിട്ടുണ്ട്. 1997, 2000 വര്‍ഷങ്ങളില്‍ വാകത്താനം ഗ്രാമപഞ്ചായത്ത് പ്രസിഡന്‍റ് ആയിരുന്നു. വാകത്താനം സര്‍വിസ് സഹ. ബാങ്ക്, ജില്ലാ സഹ. ബാങ്ക് എന്നിവയുടെ ഡയക്ടര്‍ ബോര്‍ഡ് അംഗമായും പ്രവര്‍ത്തിച്ചിട്ടുണ്ട്. കേരള കോണ്‍ഗ്രസ് -എം സംസ്ഥാന ജനറല്‍ സെക്രട്ടറിയും മുന്‍ ജില്ലാ പഞ്ചായത്ത് അംഗവും കടുത്തുരുത്തി പഞ്ചായത്ത് പ്രസിഡന്‍റുമാണ് മേരി സെബാസ്റ്റ്യന്‍. കടുത്തുരുത്തി മുട്ടുചിറ മുതുകളത്തില്‍ സെബാസ്റ്റ്യന്‍െറ (റിട്ട. മാനേജര്‍, എഫ്.സി.ഐ ചിങ്ങവനം) ഭാര്യയാണ്. മക്കള്‍: ടിറ്റു സെബാസ്റ്റ്യന്‍ (എന്‍ജിനീയര്‍ അമേരിക്ക), സിന്‍റു സെബാസ്റ്റ്യന്‍ (എന്‍ജിനീയര്‍, ഹൈദരബാദ്), സാവിയോ സെബാസ്റ്റ്യന്‍ (എന്‍ജിനീയര്‍). മരുമക്കള്‍: പ്രറ്റി ജോസ് (എന്‍ജിനീയര്‍ അമേരിക്ക), പോള്‍ (എന്‍ജിനീയര്‍), വീണ (ഇന്‍ഫോസിസ് ബംഗളൂരു).