ലൈംഗികാതിക്രമ ശ്രമവും സ്വർണാഭരണ കവര്‍ച്ചയും; രണ്ടുപേര്‍ അറസ്​റ്റിൽ

വെഞ്ഞാറമൂട്: വീട്ടമ്മക്കുനേരെ ലൈംഗികാതിക്രമത്തിന്​ മുതിരുകയും ഒന്നരപ്പവന്‍ തൂക്കമുള്ള മാല തട്ടിയെടുക്കുകയും ചെയ്ത സംഭവത്തില്‍ രണ്ടുപേര്‍ അറസ്​റ്റില്‍. അഞ്ചല്‍ വടമണ്‍ അഗസ്ത്യക്കോട് നാല്​ സ​െൻറ്​ കോളനിയല്‍ ഷിജു വിലാസത്തില്‍ രാജന്‍ (46), സമീപവാസിയായ ഐഷാ ഭവനില്‍ നിസാം (42) എന്നിവരെയാണ് വെഞ്ഞാറമൂട് പൊലീസ് അറസ്​റ്റ്​ ചെയ്തത്. നെല്ലനാട് ഉടയന്‍പാറ കോളനിയില്‍ താമസക്കാരിയായ വീട്ടമ്മക്കുനേരെയാണ് ആക്രമശ്രമമുണ്ടായത്​. ബുധനാഴ്ച ഉച്ചക്ക് 2.30ഒാടെ നെല്ലനാട് കുറ്ററ കാറ്റാടിക്കടവ് റോഡിലായിരുന്നും സംഭവം. നടന്നുപോവുകയായിരുന്ന വീട്ടമ്മയെ ചവിട്ടി നിലത്തിട്ടശേഷം ഇരുവരും ചേര്‍ന്ന് ലൈംഗികാതിക്രമത്തിന്​ മുതിരുകയും മാല പൊട്ടിച്ചെടുത്ത് കടന്നുകളയുകയുമായിരുന്നു.

വീട്ടമ്മയുടെ നിലവിളികേട്ട് സ്ഥലത്തെത്തിയ നാട്ടുകാര്‍ തിരച്ചില്‍ നടത്തിയെങ്കിലും പ്രതികളെ കണ്ടെത്താനായില്ല. തുടര്‍ന്ന് വീട്ടമ്മ പൊലീസില്‍ പരാതിനൽകി. സൂചനകളുടെ അടിസ്ഥാനത്തില്‍ പൊലീസ്​ അഞ്ചലിലെത്തി നടത്തിയ തിരച്ചിലില്‍ ഇരുവരെയും പിടികൂടി. കുറ്റം സമ്മതിച്ചതോടെ അറസ്​റ്റ്​ രേഖപ്പെടുത്തി ഇരുവരെയും കോടതിയില്‍ ഹാജരാക്കുകയായിരുന്നു. വെഞ്ഞാറമൂട് ഇന്‍സ്‌പെക്ടര്‍ ബി. ജയന്‍, സബ് ഇന്‍സ്‌പെക്ടര്‍ ബിനീഷ് ലാല്‍, സീനിയര്‍ സിവിൽ പൊലീസ് ഓഫിസര്‍ ഷാജു, സിവിൽ പൊലീസ് ഓഫിസര്‍മാരായ മഹേഷ്, അഭിനേഷ്, റാഫി എന്നിവരാണ് പ്രതികളെ അറസ്​റ്റ്​ ചെയ്തത്.