നിരാമയ റിസോർട്ട്​:​ ക്രമസമാധാന പ്രശ്​നമുണ്ടായാൽ പൊലീസ്​ നടപടിയെടുക്കണമെന്ന്​ കോടതി

കൊച്ചി: രാജീവ് ചന്ദ്രശേഖർ എം.പിയുടെ കുമരകത്തെ റിസോർട്ടുമായി ബന്ധപ്പെട്ട് ക്രമസമാധാന പ്രശ്നങ്ങളുണ്ടായാൽ പൊലീസ് കർശന നടപടിയെടുക്കണമെന്ന് ഹൈകോടതി. ഡി.വൈ.എഫ്.െഎ നേതൃത്വത്തിൽ എം.പിയുടെ നിരാമയ റിട്രീറ്റ് റിസോർട്ട് അടിച്ചു പൊളിച്ചെന്നാരോപിച്ച് പൊലീസ് സംരക്ഷണം തേടി നൽകിയ ഹരജിയിലാണ് ഉത്തരവ്. റിസോർട്ടുമായി ബന്ധപ്പെട്ട നിർമാണത്തൊഴിലാളികളെ തടയുകയും അക്രമം നടത്തുകയും ചെയ്യുന്നതായും ഹരജിയിൽ പറയുന്നു. കേസിൽ ഡി.വൈ.എഫ്.െഎ സംസ്ഥാന കമ്മിറ്റി, ആർട്ടിസാൻസ് യൂനിയൻ (സി.െഎ.ടി.യു), കുമരകം ജനസമ്പർക്ക സമിതി തുടങ്ങിയ എതിർകക്ഷികൾക്ക് നോട്ടീസ് അയക്കാനും കോടതി ഉത്തരവിട്ടു. കേസ് 28ന് പരിഗണിക്കാൻ മാറ്റി.