കൊച്ചി മെട്രോ: പേട്ട മുതല്‍ തൃപ്പൂണിത്തുറ വരെയുള്ള നിര്‍മാണത്തിന് കല്ലിട്ടു

കാക്കനാട്: മെട്രോ റെയില്‍ തൃപ്പൂണിത്തുറയിലേക്ക് നീട്ടുന്നതിന്‍െറ ഭാഗമായി പേട്ട മുതല്‍ തൃപ്പൂണിത്തുറ വരെയുള്ള നിര്‍മാണത്തിന് കല്ലിട്ടു. ഏറ്റെടുക്കാനുള്ള സ്ഥലത്തിന്‍െറ സ്ഥാനനിര്‍ണയവും പൂര്‍ത്തിയായി. കെ.എം.ആര്‍.എല്ലിന്‍െറ നേതൃത്വത്തിലായിരുന്നു കല്ലിടല്‍. പേട്ട മുതല്‍ തൃപ്പൂണിത്തുറ വരെ 1.7 കി.മീറ്ററാണ് മെട്രോ റെയില്‍ നടപ്പാക്കുക. നിലവിലെ പ്രധാന റോഡിന്‍െറ മധ്യഭാഗത്തുനിന്ന് ഇരുവശത്തേക്കും 11 മീറ്റര്‍ വീതിയിലാണ് സ്ഥലം ഏറ്റെടുക്കേണ്ടിവരുക. ഈ ദൂരം അനുസരിച്ചാണ് ഇപ്പോള്‍ കല്ലിട്ടത്. സ്ഥലം ഏറ്റെടുക്കുമ്പോള്‍ കച്ചവടസ്ഥാപനങ്ങളെയും വീടുകളെയും ഭാഗികമായി മാത്രമേ ബാധിക്കൂവെന്ന് ഉദ്യോഗസ്ഥര്‍ വ്യക്തമാക്കി. രണ്ട് വീട് മാത്രമേ പൂര്‍ണമായി പൊളിക്കേണ്ടിവരൂ. ഇതുസംബന്ധിച്ച റിപ്പോര്‍ട്ട് കെ.എം.ആര്‍.എല്ലിന് സമര്‍പ്പിച്ചിട്ടുണ്ട്. സ്ഥലം ഏറ്റെടുക്കുന്നതിനുള്ള റിക്വസിഷന്‍ ലഭിക്കുന്ന മുറക്ക് ജില്ലാ ഭരണകൂടം സ്ഥലം ഏറ്റെടുക്കും. സ്ഥല വില പിന്നീട് ഡി.എല്‍.പി.സി (ജില്ലാതല) പര്‍ച്ചേസ് കമ്മിറ്റി തീരുമാനിക്കും.