തെരുവുനായുടെ ആക്രമണത്തിൽ 16 പേർക്ക്​ പരിക്ക്​

കണ്ണൂർ സിറ്റി: മരക്കാർകണ്ടി, തയ്യിൽ ഭാഗങ്ങളിൽ തെരുവ് നായുടെ ആക്രമണത്തിൽ 16 പേർക്ക് പരിക്കേറ്റു. പരിക്കേറ്റവർ ജില്ല ആശുപത്രിയിൽ ചികിത്സ തേടി. ചൊവ്വാഴ്ച രാവിലെ മുതൽ മരക്കാർകണ്ടി, തയ്യിൽ, നീർച്ചാൽ ഭാഗങ്ങളിൽ പശുക്കളെയും കോഴികളെയും കടിച്ച് ഓടുന്നതിനിടയിൽ വഴിയിൽ കണ്ട ആളുകളെയും നായ് കടിക്കുകയായിരുന്നു. കേരള ഗ്രാമീണ ബാങ്ക് തയ്യിൽ ബ്രാഞ്ച് ഓഫിസർ സുരേഷ് ഭട്ട് (57), തയ്യിൽ ആലംസിൽ റിഷിൻ (11), മരക്കാർകണ്ടിയിലെ സിദ്ദീഖി​െൻറ മകൻ മഷൂഖ് (13), തയ്യിൽ ഷംസീനാസിൽ ഫാത്തിമ (45), ചെക്കിക്കുളം മാണിയൂർ അഷ്റഫ് (45), തയ്യിൽ മുസ്തഫ കോട്ടേജിൽ നസീമ (45), മരക്കാർകണ്ടി രാഗം തിയറ്ററിനടുത്ത ഗോകുലത്തിൽ സൈമേഷ് (55), മരക്കാർകണ്ടി പൊലീസ് സ്റ്റേഷനടുത്തുള്ള പടിഞ്ഞാറെ വീട്ടിൽ രമ്യ (26), താണ നാജിയാസിൽ ഫാത്തിബി (49), തയ്യിൽ വി.കെ ഹൗസിൽ അസ്‌നാബി (47), മുണ്ടലൂർ വടക്കുമ്പാട് പുതിയ പറമ്പത്ത് വല്ലി (59), മധുവി​െൻറ മകൾ രമ്യ (ഏഴ്), തയ്യിൽ അഹമ്മദ് (66), കോയയുടെ ഭാര്യ നസീമ (49) തുടങ്ങിയവർക്കാണ് കടിയേറ്റത്. തയ്യിൽ ബ്രാഞ്ചിൽനിന്നും വൈകീട്ട് മൂന്നരയോടെ അഴീക്കോട് ബ്രാഞ്ചിലേക്ക് പോകാൻ ബൈക്കി​െൻറ പിറകിൽ കയറുന്നതിനിടെയാണ് സുരേഷ് ഭട്ടിനെ നായ് കാലിൽ കടിച്ചത്. സൈമേഷ് സൈക്കിളിൽ പോകവേ പിറകെ ഓടിയെത്തിയാണ് കടിച്ചത്. രമ്യക്ക് ബസിൽ നിന്നുമിറങ്ങി വീട്ടിലേക്ക് നടന്നുപോകുന്ന വഴിയിൽ വെച്ചാണ് കടിയേറ്റത്. മരക്കാർകണ്ടി ബൂസ്റ്റർ ക്ലബിനു സമീപത്ത് നിന്നുമാണ് നാലുപേർക്ക് കടിയേറ്റത്. ഫാത്തിബിക്ക് മീൻവാങ്ങി വരവേ നാലരയോടെയായിരുന്നു കടിയേറ്റത്. ഒരു തമിഴ്നാട് സ്വദേശിക്കും കടിയേറ്റിട്ടുണ്ട്.