വീഴാനൊരുങ്ങി ഒരു സ്കൂള്‍ കെട്ടിടം

ചെറുവത്തൂര്‍: ഏതു നിമിഷവും നിലംപതിക്കുമെന്ന അവസ്ഥയിലാണ് ചീമേനി ഗവ. ഹയര്‍ സെക്കന്‍ഡറി സ്കൂളിലെ കെട്ടിടം. അപകടാവസ്ഥയിലായതിനെ തുടര്‍ന്ന് കെട്ടിടത്തില്‍നിന്ന് ക്ളാസുകള്‍ മാറ്റിയിരുന്നു. എന്നാല്‍, കുട്ടികള്‍ ഒഴിവുസമയങ്ങളില്‍ കെട്ടിടത്തിനുള്ളില്‍ കളിക്കുകയും ഇതിനു സമീപത്തിരുന്ന് ഭക്ഷണം കഴിക്കുകയും ചെയ്യു ന്നുണ്ട്. കണ്‍മുന്നില്‍ അപകടസാധ്യതയുണ്ടായിട്ടും നടപടിയെടുക്കാന്‍ അധികൃതര്‍ തയാറാവുന്നില്ല. കെട്ടിടം പൊളിച്ചുമാറ്റണമെന്ന് രക്ഷിതാക്കള്‍ നിരവധി തവണ ആവശ്യപ്പെട്ടതാണ്. കനത്ത മഴയില്‍ പേടിയോടെയാണ് കുട്ടികള്‍ ഇതുവഴി കടന്നുപോകുന്നത്. അപകടമുണ്ടായാല്‍ മാത്രമേ നടപടിയെടുക്കൂ എന്ന ചോദ്യമാണ് രക്ഷിതാക്കള്‍ ഉയര്‍ത്തുന്നത്.