പ്രളയ പുനർനിർമാണം: രാമോജി ഫിലിം സിറ്റിയുടെ 121 വീട് കൈമാറി
text_fieldsആലപ്പുഴ: ലൈഫ് ഭവനപദ്ധതിയുടെ അടുത്തഘട്ടമായി സ്വന്തമായി വീടോ ഭൂമിയോ ഇല്ലാത്തവർ ക്ക് ഓരോ ജില്ലയിലും ഒരു ഭവനസമുച്ചയമെങ്കിലും സർക്കാർ നിർമിക്കുമെന്ന് മുഖ്യമന്ത്ര ി പിണറായി വിജയൻ. ഇതിന് വിവിധ വകുപ്പുകളുടെ കൈവശമുള്ള ഭൂമി ഏറ്റെടുത്താണ് സ്ഥലം കണ്ടെത്തുക. ഇത് സാധ്യമായില്ലെങ്കിൽ മറ്റ് മാർഗങ്ങൾ തേടുമെന്നും മുഖ്യമന്ത്രി പറഞ്ഞു. പ്രളയാനന്തര പുനർ നിർമാണഭാഗമായി മുഖ്യമന്ത്രിയുടെ അഭ്യർഥനപ്രകാരം ഹൈദരാബാദിലെ രാമോജി ഫിലിം സിറ്റി, പ്രളയ ദുരന്തബാധിതർക്ക് കുടുംബശ്രീ ഭവനനിർമാണ യൂനിറ്റുകൾ വഴി നിർമിച്ചുനൽകിയ 121 ഭവനത്തിെൻറ താക്കോൽദാനം നിർവഹിക്കുകയായിരുന്നു മുഖ്യമന്ത്രി. ഏഴ് കോടി ചെലവഴിച്ചാണ് രാമോജി ഫിലിം സിറ്റി വീട് നിർമാണം പൂർത്തിയാക്കിയത്. പാവപ്പെട്ടവർക്ക് കേവലം വീട് മാത്രമല്ല, തൊഴിൽ, പ്രായമായവർക്കും രോഗികൾക്കും പരിചരണം തുടങ്ങിയവയെല്ലാം ലഭ്യമാക്കാനാണ് സർക്കാർ ഉദ്ദേശിക്കുന്നത്.
സർക്കാർ കുടുംബശ്രീയെ ശാക്തീകരിച്ചു. നിർമാണമേഖലയിലെ തൊഴിൽ പുരുഷന്മാരുടെ കുത്തകയായിരുന്നത് മാറ്റി വനിതകൾക്കും അവസരം ഒരുക്കാൻ കുടുംബശ്രീക്ക് കഴിഞ്ഞു. 415 വനിതകൾക്കാണ് കെട്ടിട നിർമാണത്തിൽ കുടുംബശ്രീ ആലപ്പുഴയിൽ പരിശീലനം നൽകിയത്. ഇവർ ഇപ്പോൾതന്നെ 14 ലൈഫ് ഭവനവും നല്ലരീതിയിൽ പൂർത്തീകരിച്ചു. വീടുകൾ നമുക്ക് നിർമിച്ചുനൽകിയ രാമോജി ഫിലിം സിറ്റി ഉടമകളെ അഭിനന്ദിച്ച മുഖ്യമന്ത്രി തുടർന്നും സഹകരണം അഭ്യർഥിച്ചു. ധാരണപത്രം പ്രകാരം 116 വീടാണ് നിർമിക്കേണ്ടിയിരുന്നത്. മിച്ചം തുക കണ്ടെത്തി 121 വീട് പൂർത്തീകരിക്കാൻ കഴിഞ്ഞു. ലൈഫ് പദ്ധതി വഴി രണ്ടുലക്ഷം വീടാണ് പൂർത്തിയാക്കിവരുന്നതെന്നും മുഖ്യമന്ത്രി പറഞ്ഞു. രാമോജി ഫിലിം സിറ്റിയുടെ പ്രതിനിധി ചെറുകുരി കിരണിനെ മുഖ്യമന്ത്രി ഉപഹാരം നൽകി ആദരിച്ചു. വീട് നിർമാണം വേഗത്തിലാക്കി എട്ട് മാസത്തിനകം പദ്ധതി പൂർത്തീകരിക്കുന്നതിന് നേതൃത്വം നൽകിയ മുൻ സബ്കലക്ടർ വി.ആർ. കൃഷ്ണ തേജക്കുള്ള ഉപഹാരവും മുഖ്യമന്ത്രി നൽകി. ധനമന്ത്രി ഡോ. ടി.എം. തോമസ് ഐസക് അധ്യക്ഷത വഹിച്ചു.
എല്ലാ പഞ്ചായത്തിലും കുടുംബശ്രീയുടെ കെട്ടിട നിർമാണ യൂനിറ്റ് തുടങ്ങുമെന്ന് അദ്ദേഹം പറഞ്ഞു. വനിതകളുടെ നിർമാണ ഗ്രൂപ്പുകൾക്കുള്ള അനുമോദനവും ഇൻസെൻറിവ് വിതരണവും മന്ത്രി ജി. സുധാകരൻ നിർവഹിച്ചു. പദ്ധതി നിർവഹണം നടത്തിയ ടീം അംഗങ്ങൾക്കുള്ള സർട്ടിഫിക്കറ്റ് വിതരണം ഭക്ഷ്യ സിവിൽസപ്ലൈസ് മന്ത്രി പി. തിലോത്തമൻ നിർവഹിച്ചു. എ.എം. ആരിഫ് എം.പി, രാമോജി ഗ്രൂപ്പിെൻറ മാർഗദർശി ചിട്ടി ഫണ്ട് എം.ഡി ശൈലജ കിരൺ, ജില്ല പഞ്ചായത്ത് പ്രസിഡൻറ് ജി. വേണുഗോപാൽ, കുടുംബശ്രീ ഡയറക്ടർ ആശ വർഗീസ്, കുടുംബശ്രീ ഗവേണിങ് ബോഡി അംഗം സി.എസ്. സുജാത, ആര്യാട് ബ്ലോക്ക് പഞ്ചായത്ത് പ്രസിഡൻറ് ഷീന സനൽകുമാർ, ജില്ല മിഷൻ കോഓഡിനേറ്റർ ജെ. പ്രശാന്ത് ബാബു, കയർ കോർപറേഷൻ മുൻ ചെയർമാൻ ആർ. നാസർ, വിവിധ പഞ്ചായത്ത് പ്രസിഡൻറുമാർ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.