പാട്ടിലൂടെ കണക്ക് ചൊല്ലിപ്പഠിപ്പിച്ച് ജെസി ടീച്ചർ; വിഡിയോ തരംഗമായി
text_fieldsമണ്ണഞ്ചേരി: ‘മുത്തിയമ്മ പോറ്റിവളർത്തിയ കോഴിക്കുഞ്ഞുങ്ങൾ’ ഒാരോന്നായി നഷ്ടപ്പെടുന്നതിെൻറ ദൈന്യത പാട്ടിലൂടെ അവതരിപ്പിച്ച് കുട്ടികളെ കണക്കുപഠിപ്പിച്ച ജെസി ടീച്ചർ സമൂഹമാധ്യമങ്ങളിലെ താരമായി. മുഹമ്മ സി.എം.എസ് എൽ.പി സ്കൂളിലെ ജെസി തോമസ് പാട്ടിലൂടെ കുട്ടികളെ കണക്കുപഠിപ്പിക്കുന്നതിെൻറ വിഡിയോ ദൃശ്യം ഇതിനോടകം രണ്ടുലക്ഷത്തിലേറെ പേരാണ് കണ്ടത്. പതിനായിരങ്ങളാണ് ഫേസ്ബുക്കിലൂടെ ഇത് പങ്കുവെച്ചത്. ഫേസ്ബുക്കിൽ പ്രത്യേക കുറിപ്പുകളോടെ മന്ത്രിമാരും വിഡിയോ പങ്കുവെച്ചിച്ചുണ്ട്. വിദ്യാഭ്യാസ മന്ത്രി പ്രഫ. സി. രവീന്ദ്രനാഥ് സ്കൂൾ സന്ദർശിക്കാനുള്ള ആഗ്രഹം പ്രകടിപ്പിക്കുകയും ചെയ്തു. അധ്യാപക പരിശിലനത്തിൽനിന്ന് ലഭിച്ച പാട്ടാണ് ഒന്നാംക്ലാസിലെ കുട്ടികളെ ചൊല്ലിക്കേൾപ്പിച്ചത്.
കണക്ക് എളുപ്പമാക്കാനായി അഭിനയത്തിനൊപ്പമായിരുന്നു ചൊല്ലിയത്. ‘പത്തു കോഴി കുഞ്ഞുങ്ങളെ മുത്തിയമ്മ പോറ്റി, പത്തിലൊരു കുഞ്ഞിനെയാ നത്തു വന്നു റാഞ്ചീ- എന്നാൽ, ബാക്കിയെത്രെ - ജെസി ടീച്ചർ പാടിയപ്പോൾ ഒമ്പതെന്ന് കുട്ടികൾ ഉത്തരം പറഞ്ഞു.കളിയിലൂടെയും പാട്ടിലൂടെയും കണക്ക് പഠിപ്പിക്കാനുള്ള വിദ്യാഭ്യാസ വകുപ്പിെൻറ ഉല്ലാസഗണിതം പരിപാടിക്ക് കൂടുതൽ തെളിമയും പിന്തുണയുമേകുന്നതാണ് ഈ വിഡിയോ. ഓരോ ദിവസത്തെയും ക്ലാസുതല പ്രവർത്തനങ്ങളുടെ ഫോട്ടോയും വിഡിയോയും ക്ലാസിെൻറ വാട്സ്ആപ് ഗ്രൂപ്പിലിടാറുണ്ട്. ഇതുകണ്ട സ്കൂളിലെ രക്ഷാകർത്താവായ ജോജോ ആണ് ഈ വിഡിയോ ആദ്യം ഫേസ്ബുക്കിൽ ഇട്ടത്.
പിന്നാലെ മന്ത്രി കെ.ടി. ജലീൽ ഷെയർ ചെയ്തതോടെ പതിനായിരങ്ങളിലേക്ക് ഇത് എത്തി. ഒരുലക്ഷത്തിലേറെ പേർ ഇതുവരെ മന്ത്രി ജലീലിെൻറ പോസ്റ്റ് കണ്ടു. വിദ്യാഭ്യാസ മന്ത്രി പ്രഫ. സി. രവീന്ദ്രനാഥ് തിങ്കളാഴ്ചയും മന്ത്രി ടി.എം. തോമസ് ഐസക് ചൊവ്വാഴ്ചയും പ്രത്യേക കുറിപ്പുകളോടെ വിഡിയോ ഫേസ്ബുക്കിൽ പോസ്റ്റ് ചെയ്തു. ജെസി ടീച്ചറെ പോെല ഒരുകൂട്ടം അധ്യാപകർ ഉണ്ടെങ്കിൽ ഏത് സ്കൂളാണ് നന്നാകാത്തതെന്ന് മന്ത്രി തോമസ് ഐസക് അഭിപ്രായപ്പെട്ടു. ഉല്ലാസഗണിതം എങ്ങനെ പ്രാവർത്തികമാക്കാം എന്നതിെൻറ ഉത്തമ ഉദാഹരണമാണ് ജെസി ടീച്ചറിെൻറ ക്ലാസെന്ന് മന്ത്രി സി. രവീന്ദ്രനാഥും ജെസി ടീച്ചർ എല്ലാ അധ്യാപകർക്കും മാതൃകയാണെന്ന് മന്ത്രി കെ.ടി. ജലീലും ഫേസ്ബുക്കിൽ കുറിച്ചു. മന്ത്രി പി. തിലോത്തമൻ, എ.എം. ആരിഫ് എം.പി, സിനിമ നടൻ ഷമ്മി തിലകൻ, സി.എസ്.ഐ സഭ സിനഡ് പരിസ്ഥിതി വിഭാഗം സെക്രട്ടറി തുടങ്ങിയവർ അഭിനന്ദിച്ചു.
രണ്ടു പതിറ്റാണ്ടിലേറെയായി അധ്യാപനരംഗത്തുള്ള ജെസി തോമസ് മുഹമ്മ സി.എം.എസ് എൽ.പി സ്കൂളിൽ 12വർഷമായി പഠിപ്പിക്കുന്നു. ജില്ലതല അധ്യാപക പരിശീലക കൂടിയായ ജെസി തോമസിന് ചേർത്തല ഗ്രീൻ സിറ്റി റോട്ടറി ക്ലബിെൻറ നേഷൻ ബിൽഡർ അവാർഡ് ലഭിച്ചിരുന്നു. ഈ സ്കൂളിലെ പ്രധാനാധ്യാപികയും സംസ്ഥാന അധ്യാപക അവാർഡ് ജേത്രിയുമായ ജോളി തോമസിെൻറ സഹോദരിയാണ് ജെസി തോമസ്. മുഹമ്മ ചിറേപ്പറമ്പിൽ പരേതരായ വി.ടി. തോമസിെൻറയും അധ്യാപികയായിരുന്ന ലൈസാമ്മയുടെയും മകളാണ്.മുഹമ്മയിൽ കൃപ ഓഫ്സെറ്റ് പ്രസ് നടത്തുന്ന വില്യം കുര്യൻ (സന്തോഷ്) ആണ് ഭർത്താവ്. വിദ്യാർഥികളായ ഏയ്ഞ്ചൽ ആൻ, ഐറിൻ ലൈസ എന്നിവർ മക്കളാണ്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.