ബിവറേജസ് ഔട്ട്​ലെറ്റിൽ മോഷണശ്രമം

കാട്ടാക്കട: കാട്ടാക്കടയിലെ ബിവറേജസ് ഔട്ട്​ലെറ്റിൽ കഴിഞ്ഞ ദിവസം രാത്രി മോഷണശ്രമം നടന്നു. അടുത്തുള്ള ഹാർഡ്‌വെയർ കടയുടെ തകര മേൽക്കൂര വഴി ഒന്നാംനിലയിലെ ഷോറൂമിലേക്ക്​ മോഷ്​ടാവ് കടക്കുന്നതിനിടെ ശബ്​ദംകേട്ട് സുരക്ഷ ജീവനക്കാരൻ എത്തിയതോടെ ഇയാൾ ഓടി രക്ഷപ്പെട്ടു. തുടർന്ന് കാട്ടാക്കട പൊലീസ്​ പരിശോധന നടത്തിയെങ്കിലും ആരെയും കണ്ടെത്താനായില്ല. കോവിഡ് നിയന്ത്രണങ്ങളുടെ ഭാഗമായി ഷോപ്പ് അടച്ചിട്ടതിനിടെയാണ് മോഷണ ശ്രമം. സുരക്ഷ ജീവനക്കാരുടെ കുറവാണ് മോഷണ സാധ്യതയുണ്ടാക്കുന്നതെന്ന് ആരോപണമുണ്ട്. മുമ്പ് ഷോപ് അടച്ചിട്ടിരുന്നപ്പോൾ രണ്ട്​ ഷിഫ്റ്റുകളിലായി രണ്ടുപേർ വീതം നാല് സുരക്ഷ ജീവനക്കാരാണ് ഇവിടെ ഉണ്ടായിരുന്നത്. വീണ്ടും തുറന്നപ്പോൾ രണ്ടുപേരായി ചുരുക്കി. ഒരാൾ പകലും മറ്റൊരാൾ രാത്രിയിലുമാണ് സേവനം.