യുവാവിനെ വെയിറ്റിങ്​ ഷെഡിൽ മരിച്ചനിലയിൽ കണ്ടെത്തി

കിളിമാനൂർ: യുവാവിനെ ബസ് കാത്തിരിപ്പ് കേന്ദ്രത്തിൽ മരിച്ചനിലയിൽ കണ്ടെത്തി. തിരുവല്ല ഓതറ തടത്തിൽ വീട്ടിൽ പ്രശാന്തിനെ(34)യാണ് കിളിമാനൂർ പൊലീസ് സ്​റ്റേഷനു സമീപത്തെ വെയിറ്റിങ്​ ഷെഡിൽ ചൊവ്വാഴ്ച രാവിലെ മരിച്ചനിലയിൽ കണ്ടത്. കമിഴ്ന്നുകിടന്ന മൃതദേഹത്തിനുസമീപം ബൈക്കും ഉണ്ടായിരുന്നു. പൊലീസ് നടത്തിയ അന്വേഷണത്തിൽ പ്രശാന്ത് തിരുവനന്തപുരം പോപ്സൺ ഗ്രൂപ്പിൽ ജോലി ചെയ്യുകയാണെന്നും മാസത്തിലൊരിക്കൽ വീട്ടിൽ പോകാറുള്ളതായും കണ്ടെത്തി. ജോലി സ്ഥലത്തു​െവച്ച് മൊബൈൽ കളഞ്ഞുപോയതായി വ്യാഴാഴ്ച വീട്ടിൽ വന്നപ്പോൾ പറഞ്ഞതായും മൊബൈൽ കിട്ടിയതായി ഞായറാഴ്ച ജോലി സ്ഥലത്തുനിന്ന് അറിയിച്ചതിനെതുടർന്ന് പ്രശാന്ത് ഉച്ചയോടെ ജോലി സ്ഥലത്തേക്ക് തിരിച്ചതായും വീട്ടുകാർ പറയുന്നു. രണ്ടു ദിവസം മുമ്പ്​ നെഞ്ചുവേദനയെ തുടർന്ന് പ്രശാന്ത് പുഷ്പഗിരി മെഡിക്കൽ കോളജിൽ ചികിത്സ തേടിയിരുന്നതായും ബന്ധുക്കൾ പറയുന്നു. മെഡിക്കൽ കോളജിലേക്ക് മാറ്റിയ മൃതദേഹം പോസ്​റ്റ്​മോർട്ടത്തിനുശേഷം ബന്ധുക്കൾക്ക് വിട്ടുനൽകും.