ആറുവയസ്സുകാരിയെ ചോദ്യംചെയ്യൽ; പൊലീസുകാർ നേരിട്ട്​ ഹാജരാകണമെന്ന്​ ബാലാവകാശ കമീഷൻ

തിരുവനന്തപുരം: ആറുവയസ്സുകാരിയെ നിർബന്ധിച്ച് മദ്യംകുടിപ്പിച്ചതുമായി ബന്ധപ്പെട്ട കേസിൽ അന്വേഷണ ഉദ്യോഗസ്​ഥർ നേരിട്ട് ഹാജരായി മൊഴി നൽകണമെന്ന് സംസ്​ഥാന ബാലാവകാശ സംരക്ഷണ കമീഷൻ ഉത്തരവായി. ആലുവ എടത്തല പൊലീസ്​ സ്​റ്റേഷൻ ഹൗസ്​ ഓഫിസർ സുബൈർ, ചൈൽഡ് വുമൺ പൊലീസ്​ ഓഫിസർ മഞ്ജു എന്നിവരാണ്​ 22ന്​ ഹാജരാകേണ്ടത്​. കുട്ടിയെ പത്തിലധികം തവണ ചോദ്യംചെയ്ത പൊലീസ്​ പ്രതിയായ ഭർതൃസഹോദരിയെ ഒരിക്കൽപോലും ചോദ്യംചെയ്യുകയോ കസ്​റ്റഡിയിലെടുക്കുകയോ ചെയ്തില്ലെന്ന് കാട്ടി കുട്ടിയുടെ മാതാവ് നൽകിയ പരാതിയിലാണ് നടപടി. പ്രതിയെ സംരക്ഷിക്കുന്ന നിലപാടാണ് തുടക്കംമുതൽ പൊലീസ്​ സ്വീകരിക്കുന്നതെന്ന് പരാതിയിൽ പറയുന്നു. ആഗസ്​റ്റ് 16ന് എസ്​.എച്ച്​.ഒയും സംഘവും പൊലീസ്​ വാഹനത്തിൽ യൂനിഫോമിൽ വീട്ടിലെത്തി കുട്ടിയെ ചോദ്യംചെയ്തു. 24ന്​ എടത്തല എസ്​.എച്ച്​.ഒയും സി.​െഎയും രണ്ടുവണ്ടി പൊലീസുമായി വീണ്ടുമെത്തി കുട്ടിയെയും മാതാപിതാക്കളെയും ചോദ്യംചെയ്തു. കുട്ടിയുമായി ബന്ധപ്പെട്ട് നിലവിലുള്ള പോക്സോ കേസ്​ അന്വേഷണം എടത്തല സ്​റ്റേഷനിൽനിന്ന് മാറ്റി ആലുവ ഈസ്​റ്റ് എസ്​.എച്ച്​.ഒയെ ഏൽപിച്ചിരിക്കുകയാണ്. അതിനുശേഷം മദ്യം കുടിപ്പിച്ച കേസ്​ അന്വേഷിക്കാനെന്ന് പറഞ്ഞാണ് പൊലീസ്​ വീണ്ടും എത്തിയതെന്ന് പരാതിക്കാരി ബോധിപ്പിച്ചു. ഇത്തരം കേസുകളിൽ പുലർത്തേണ്ട രഹസ്യസ്വഭാവം ഇല്ലാതാക്കിയതായും പൊലീസ്​ സന്നാഹം മാനഹാനിക്ക് ഇടയാക്കിയെന്നും പരാതിക്കാരി ബോധിപ്പിച്ചു. പതിനഞ്ചുകാരന് പീഡനം: ബാലാവകാശ കമീഷൻ കേസെടുത്തു തിരുവനന്തപുരം: ന്യൂ മാഹിയിൽ പതിനഞ്ചുകാരനെ പീഡിപ്പിച്ച പരാതിയിൽ സംസ്​ഥാന ബാലാവകാശ സംരക്ഷണ കമീഷൻ സ്വമേധയാ കേസെടുത്തു. പീഡനത്തിന്​ വിധേയനായ കുട്ടിയെ തലശ്ശേരി സഹകരണ ആശുപത്രിയിൽ പ്രവേശിപ്പിച്ചിരിക്കുകയാണ്. രാഷ്​ട്രീയ നേതാവായ പഞ്ചായത്തംഗമാണ് പ്രതിസ്​ഥാനത്ത്.