പി.എസ്.സി പിൻവാതിൽ നിയമനം: സർക്കാർ യുവാക്കളോട് കാണിക്കുന്നത് കൊടുംവഞ്ചന -വെൽഫെയർ പാർട്ടി

തിരുവനന്തപുരം: കേരള പി.എസ്.സിയിൽ സംസ്ഥാന സർക്കാറി​ൻെറ നേരിട്ടുള്ള ഇടപെടലിലൂടെ വൻതോതിൽ പിൻവാതിൽ നിയമനവും ജോലി വാഗ്ദാനം ചെയ്ത് കൈക്കൂലി വാങ്ങലും വ്യാപകമായി നടക്കുന്നെന്നതി​ൻെറ അവസാന തെളിവാണ് ഭരണമുന്നണി ഘടകകക്ഷിയുടെ യുവനേതാവ്‌ ഉദ്യോഗാർഥിയിൽനിന്ന്​ നാലുലക്ഷം രൂപ വാങ്ങിയതെന്ന് വെൽഫെയർ പാർട്ടി സംസ്ഥാന പ്രസിഡൻറ്​ ഹമീദ് വാണിയമ്പലം. ഇടതു സർക്കാർ അധികാരത്തിലേറിയ ശേഷം നടന്ന പി.എസ്.സി നിയമനങ്ങളിലെ ക്രമക്കേട് പല സന്ദർഭങ്ങളിലായി പുറത്തുവന്നതാണ്. യൂനിവേഴ്സിറ്റി കോളജ് കൊലപാതകശ്രമക്കേസിലെ പ്രതി ശിവരഞ്ജിത്തിന് പൊലീസ് ടെസ്​റ്റിൽ ഒന്നാം റാങ്ക് നൽകിയതുൾപ്പെടെ വിവിധ വിഷയങ്ങളിൽ പി.എസ്‌.സിയിൽ അനധികൃത ഇടപെടൽ നടന്നു. നിരവധി യുവാക്കൾ കഠിനാധ്വാനത്തിലൂടെ പഠിച്ച് റാങ്ക് നേടുമ്പോൾ രാഷ്​ട്രീയ സ്വാധീനം ഉപയോഗിച്ച് പിൻവാതിലിലൂടെയും കൈക്കൂലി നൽകിയും ജോലി നേടുന്നത് അപഹാസ്യമാണ്. എൽ.ഡി.സി, എൽ.ജി.എസ്​, പൊലീസ് ബറ്റാലിയൻ, അസിസ്​റ്റൻറ്​ സെയിൽസ്മാൻ തുടങ്ങിയ വിവിധ തസ്തികകളിൽ കഴിഞ്ഞ സർക്കാറുകളെക്കാൾ വളരെ കുറഞ്ഞ നിയമനങ്ങളാണ് പിണറായി സർക്കാറി​ൻെറ കാലത്ത് നടന്നിട്ടുള്ളതെന്നും അദ്ദേഹം ചൂണ്ടിക്കാട്ടി.