നികുതി ഒഴിവാക്കിയതിനാൽ കൂടുതൽ ബസുകൾ നിരത്തിലിറക്കുമെന്ന് ഉടമകൾ

പാലക്കാട്: ത്രൈമാസ റോഡ് നികുതി താൽക്കാലികമായി ഒഴിവാക്കാമെന്ന ഗതാഗത മന്ത്രിയുടെ ഉറപ്പിൻമേൽ അടുത്ത ദിവസങ്ങളിൽ സംസ്ഥാനത്ത് കൂടുതൽ സ്വകാര്യ ബസുകൾ നിരത്തിലിറങ്ങുമെന്ന് ബസ് ഉടമകളുടെ സംയുക്ത സമിതി ജനറൽ കൺവീനർ ടി. ഗോപിനാഥൻ, ചെയർമാൻ ലാറൻസ് ബാബു എന്നിവർ പറഞ്ഞു. ജൂ​ൈല, ആഗസ്​റ്റ്​, സെപ്റ്റംബർ മാസങ്ങളിലെ നികുതിയാണ് സർക്കാർ ഒഴിവാക്കുന്നത്. ഏകദേശം 30,000 രൂപയാണ് ത്രൈമാസ നികുതിയായി സർക്കാറിലേക്ക് അടയ്​ക്കുന്നത്. ഇതിനുപുറമെ മോട്ടോർ തൊഴിലാളി ക്ഷേമനിധി വിഹിതം ഏപ്രിൽ മുതൽ സെപ്റ്റംബർ 30 വരെ ഒഴിവാക്കാൻ തിരുമാനിച്ചിട്ടുണ്ട്. കോവിഡ് 19 സാഹചര്യത്തിൽ ബസിൽ യാത്രക്കാർ കുറവായതിനാൽ സ്വകാര്യ ബസുകളിൽ പകുതിയും ജി ഫോം നൽകി നിർത്തിയിട്ടിരിക്കുകയാണ്. ഇളവ് നൽകിയതോടെ വരും ദിവസങ്ങളിൽ ജി ഫോം പിൻവലിച്ച് കൂടുതൽ സ്വകാര്യ ബസുകൾ നിരത്തിലിറങ്ങിയേക്കും. ബസുടമകളുടെ അഭ്യർഥനയെ തുടർന്ന്​ ഏപ്രിൽ മുതൽ ജൂൺ വരെയുള്ള നികുതിയും സർക്കാർ ഒഴിവാക്കിയിരുന്നു. സംസ്ഥാനത്ത് പന്ത്രണ്ടായിരത്തിഅറനൂറോളം സ്വകാര്യ ബസുകളുണ്ട്. ഡിസംബർ വരെ നികുതി ഒഴിവാക്കണമെന്നാണ് ബസുടമകളുടെ ആവശ്യം.