ദുരവസ്ഥയുടെയും ചണ്ഡാലഭിക്ഷുകിയുടെയും നൂറാം വാർഷികാഘോഷവുമായി സാഹിത്യ അക്കാദമി

തൃശൂർ: കുമാരനാശാന്റെ ദുരവസ്ഥ, ചണ്ഡാലഭിക്ഷുകി എന്നീ ഖണ്ഡകാവ്യങ്ങളുടെ നൂറാം വാർഷികം കേരള സാഹിത്യ അക്കാദമി സമുചിതമായി ആഘോഷിക്കും. രണ്ട്​ കൃതികളും ജാതിക്കും സാമൂഹികമായ അനീതികൾക്കുമെതിരെ ഉയർത്തിയ ശക്തമായ നിലപാട് കേരളത്തിന്റെ സമകാലീന സാഹചര്യത്തിൽ ഏറെ പ്രസക്തമാണെന്ന് പ്രസിഡന്റ് സച്ചിദാനന്ദനും സെക്രട്ടറി സി.പി. അബൂബക്കറും പറഞ്ഞു. കേരളത്തിന്റെ വിവിധ ഭാഗങ്ങളിൽ സെമിനാറുകളും സാംസ്കാരികപരിപാടികളും സംഘടിപ്പിക്കും. മലയാളികൾ താമസിക്കുന്ന മറ്റു പ്രദേശങ്ങളിലും ഈ രണ്ടു കൃതികളുടെയും സന്ദേശമെത്തിക്കാനുള്ള പ്രവർത്തനങ്ങൾ നടത്തും. കേരളത്തിന് നഷ്ടമാകുന്ന നവോത്ഥാനമൂല്യങ്ങളുടെ സാംസ്കാരികമായ വീണ്ടെടുപ്പായിരിക്കും വാർഷികാഘോഷ പരിപാടികളെന്ന് ഇരുവരും അറിയിച്ചു.