വാക്​സിൻ സമത്വത്തിനായി വാർഡുതല രജിസ്ട്രേഷൻ പദ്ധതി

കോഴിക്കോട്: കോവിഡ് പ്രതിരോധ വാക്​സിൻ ബുക്കിങ് സാധാരണക്കാർക്ക് സാധിക്കുന്നില്ലെന്ന നിരന്തര പരാതിക്ക് പരിഹാരവുമായി ആരോഗ്യ വകുപ്പ്. ദാരിദ്ര്യ രേഖക്കു താഴെയുള്ളവർ, ഉൾപ്രദേശങ്ങളിൽ താമസിക്കുന്നവർ, സ്​മാർട്ട്ഫോൺ, കമ്പ്യൂട്ടർ, ഇൻറർനെറ്റ് സൗകര്യങ്ങൾ ഇല്ലാത്തവർ എന്നിവർക്കായി വാർഡ് തലത്തിൽ രജിസ്ട്രേഷൻ നടത്താൻ പ്രത്യേക പരിപാടി സംഘടിപ്പിക്കും. 'കോവിൻ' ​പോർട്ടലിൽ പേരുകൾ രജിസ്​റ്റർ ചെയ്യാനുള്ള സൗകര്യമാണൊരുക്കുന്നത്​. ഇവരുടെ വാക്സിൻ രജിസ്ട്രേഷൻ ജൂലൈ 31 ന് മുമ്പ് പൂർത്തിയായെന്ന് ആശ വർക്കർമാർ ഉറപ്പുവരുത്തണം. ഓരോ പ്രദേശത്തേക്കും ജനസംഖ്യാനുപാതികമായാണ് വാക്​സിൻ ലഭ്യമാക്കുന്നത്. എത്ര പേർക്ക് വാക്​സിൻ നൽകാനുണ്ട്​ എന്നറിയാൻ കൂടിയാണ്​ രജിസ്ട്രേഷൻ നടപടികൾ വാർഡിലേക്കെത്തുന്നത്​​. പിന്നീട്​ ക്യാമ്പുകളിലും ആശുപത്രികളിലും വെച്ച്​ വാക്​സിൻ നൽകും. വീടുകളിലോ പൊതു സ്ഥലങ്ങളിലോ ആശാ വർക്കർമാരുടെ നേതൃത്വത്തിൽ രജിസ്ട്രേഷൻ നടത്തും. പ്രാഥമികാരോഗ്യ കേന്ദ്രങ്ങൾ, സാമൂഹികാരോഗ്യ കേന്ദ്രങ്ങൾ, നഗര ആരോഗ്യ കേന്ദ്രങ്ങൾ, മറ്റ് ആരോഗ്യ സ്ഥാപനങ്ങൾ എന്നിവയുടെ സഹകരണത്തോടെയും രജിസ്ട്രേഷൻ സംഘടിപ്പിക്കും. പഞ്ചായത്ത് തലത്തിൽ നടത്തുന്ന വാക്​സിനേഷൻ ക്യാമ്പുകളിൽ നിന്ന് കുത്തിവെപ്പ് എടുക്കാൻ നേരത്തേ ബുക്ക് ചെയ്യേണ്ടതില്ല. വാക്​സിനേഷനായി കോവിൻ സൈറ്റിൽ രജിസ്​റ്റർ ചെയ്​തവർക്ക്​ സ്പോട്ട് രജിസ്ട്രേഷനിലൂടെ ക്യാമ്പുകളിൽ നിന്ന് വാക്​സിൻ നൽകും. നേരത്തേ ജൂലൈ 15നു മുമ്പ് വാക്​സിനേഷൻ പൂർത്തിയാക്കാനായിരുന്നു ആവശ്യപ്പെട്ടിരുന്നതെങ്കിലും ആവശ്യത്തിന് വാക്​സിൻ ലഭിക്കാത്തതിനാൽ സംസ്​ഥാനത്ത്​ പകുതി പേർക്ക് മാത്രമേ ഒരു ഡോസ് വാക്​സിനെങ്കിലും നൽകാനായിരുന്നുള്ളൂ. നിലവിൽ 1.72 കോടിയോളം പേർക്കാണ് സംസ്​ഥാനത്ത്​ വാക്​സിൻ കുത്തിവെച്ചത്​. 1.22 കോടിയോളം പേർ ആദ്യ ഡോസ് മാത്രം ലഭിച്ചവരാണ്. 50.25 ലക്ഷത്തോളം പേർക്ക് രണ്ട് ഡോസും ലഭിച്ചു. 1.27 കോടിയോളം പേർ ഒരു ഡോസും ലഭിക്കാത്തവരാണ്. അതേസമയം, ഗർഭിണികൾക്കും വാക്​സിനേഷൻ ആരംഭിച്ചിട്ടുണ്ട്. ഗർഭകാലത്തി‍ൻെറ ഏതു ഘട്ടത്തിലും വാക്​സിൻ സ്വീകരിക്കാവുന്നതാണ്. സർക്കാർ തലത്തിൽ ഡോക്​ടർമാർ വാക്​സിനേഷൻ സംബന്ധിച്ച് ഗർഭിണികൾക്ക് ബോധവത്കരണം നൽകുന്നുണ്ട്. എന്നാൽ സ്വകാര്യ മേഖലകളിലെ ഡോക്​ടർമാർ കൂടി അവരുടെ മുന്നിലെത്തുന്ന ഗർഭിണികൾക്ക് ബോധവത്കരണം നൽകിയാൽ മാത്രമേ ഇത് ഫലപ്രദമാകൂവെന്നാണ്​ ആരോഗ്യവകുപ്പി​‍ൻെറ വിലയിരുത്തൽ. വി. ഗാർഗി