പ്രചാരണ കമ്മിറ്റി കൺവീനർക്കും പ്രായപൂർത്തിയാകാത്ത മകനും മർദനം; യുവാവിനെ അറസ്​റ്റ്​ ചെയ്തു

കുരുവട്ടൂർ: സ്വതന്ത്ര സ്ഥാനാർഥിയുടെ തെരഞ്ഞെടുപ്പ് പ്രചാരണ കമ്മിറ്റി കൺവീനറെയും പ്രായപൂർത്തിയാകാത്ത മകനെയും മൂന്നംഗ സംഘം ആക്രമിച്ചു പരിക്കേൽപിച്ചതായി പരാതി. കരമ്പിൽ ശ്രീജിത്ത് കുരുവട്ടൂരിനെയും എട്ടാം ക്ലാസ് വിദ്യാർഥിയായ മകനെയുമാണ് ആക്രമിച്ചത്. വെള്ളിയാഴ്ച രാത്രി അയൽവാസികളായ രണ്ടുപേരും കണ്ടാലറിയുന്ന ഒരാളും ചേർന്ന് മർദിച്ചെന്നാണ്​ പരാതി. സംഘാംഗം പയ​മ്പ്ര മൂലപിലാക്കൽ തഴക്കോട്ടുമലയിൽ സുനീഷ് കുമാറിനെ (26) ചേവായൂർ എസ്.ഐ എം.കെ. അനിൽകുമാർ അറസ്​റ്റ്​ ചെയ്തു. മറ്റു രണ്ടുപേർക്കായി അന്വേഷണം തുടങ്ങി. തെരഞ്ഞെടുപ്പ് പ്രചാരണവുമായി ബന്ധപ്പെട്ട ആലോചനയോഗം കഴിഞ്ഞ് മകനുമായി വീട്ടിലേക്ക് മടങ്ങവെ സമീപത്തെ അംഗൻവാടിയിൽ മൂന്നംഗ സംഘം മദ്യപിക്കുന്നത്​ ചോദ്യം ചെയ്തതി​ൻെറ പേരിലാണ് ആക്രമണമെന്ന്​ പറയുന്നു. സംഭവം മൊബൈൽ ഫോണിൽ ​െറക്കോർഡ് ചെയ്തതിന്​ ശ്രീജിത്തി​ൻെറ 13കാരനായ മകനെ മർദിച്ചു. ശ്രീജിത്ത് മെഡിക്കൽ കോളജ് ആശുപത്രിയിലും മകൻ നരിക്കുനി പ്രാഥമിക ആരോഗ്യകേന്ദ്രത്തിലും ചികിത്സ തേടി. ദലിത് വിഭാഗത്തിൽപ്പെട്ട ശ്രീജിത്തിനെ തെരഞ്ഞെടുപ്പിൽ പഞ്ചായത്തിൽ പൗരാവകാശ സംരക്ഷണ സമിതിയുടെ സ്വതന്ത്ര സ്ഥാനാർഥിയായി നിർത്താൻ ആലോചിച്ചിരുന്നു. രാഷ്​ട്രീയ പാർട്ടികളുടെ ഭീഷണി കാരണമാണ്​ ഇതിൽനിന്ന്​ പിന്മാറിയതെന്ന്​ പറയുന്നു. വധശ്രമം, ജുവനൈൽ ആക്ട് എന്നിവ അനുസരിച്ചാണ് കേ​െസടുത്തതെന്ന് എസ്.ഐ അനിൽകുമാർ പറഞ്ഞു.