തലയാട് ചീടിക്കുഴിയിൽ തെരുവുനായ്ക്കൾ കേഴമാനിനെ കടിച്ചുകൊന്നു

ബാലുശ്ശേരി: തലയാട് ചീടിക്കുഴി ഭാഗത്ത് തെരുവുനായ് ശല്യം രൂക്ഷം. കേഴമാനിനെ നായ്ക്കൾ കടിച്ചുകൊന്നു. ചൊവ്വാഴ്​​ച രാവിലെയോടെയാണ് തലയാട് ചീടിക്കുഴി വനപ്രദേശത്തോടടുത്ത ജനവാസ മേഖലയിൽ കൂട്ടമായെത്തിയ തെരുവുനായ്ക്കളുടെ ആക്രമണത്തിൽ കേഴമാൻ (കാട്ടാട്) ചത്തത്. വനാതിർത്തിയിലെ തോട്ടിലേക്ക് വെള്ളം കുടിക്കാനിറങ്ങിയ കേഴമാനിനെയാണ് തെരുവു നായ്ക്കൾ കടിച്ചുകൊന്നത്. കക്കയം വന്യജീവി സങ്കേതത്തി​ൻെറ അതിർത്തിപ്രദേശം കൂടിയാണ് ചീടിക്കുഴി പ്രദേശം. കക്കയം സെക്​ഷൻ ഫോറസ്​റ്റർ എ.എം. ഷാനിയുടെ നേതൃത്വത്തിൽ വനം വകുപ്പ് ഉദ്യോഗസ്ഥരെത്തി പരിക്കേറ്റ കേഴമാനിന് പ്രാഥമിക ശുശ്രൂഷ നൽകിയെങ്കിലും രക്ഷിക്കാനായില്ല. ചീടിക്കുഴി ഭാഗത്ത് തെരുവുനായ്ക്കളുടെ ആക്രമണം വർധിച്ചുവരുകയാണ്.